مش هنستورد تاني.. افتتاح 1000 مصنع في قناة السويس قريب.. ايه اللي هتعمله الصين في مصر؟ (فيديو)
واضح كده أن الفترة الجاية منطقة قناة السويس هتروح في حتة تانية خالص، مشاريع اقتصادية وفرص استثمارية كتير بتخطط ليها القناة السويس الفترة الجاية بالشراكة مع شراكات عالمية.
والساعات الأخيرة رئيس المنطقة الاقتصادية لقناة السويس، وليد جمال الدين، قال إن شركة تيدا الصينية "TEDA" بتسعى أنهم يتوسعوا في مصر ويشتروا اراضي جديدة على مساحة 10 مليون متر مربع، في نطاق المنطقة الاقتصادية لقناة السويس.
وقال أن الأراضي الجديدة اللي هتشتريها "تيدا" هيتم إتاحتها للشركة بعد موافقة مجلس إدارة الهيئة على 3 مراحل، الرحلة الأولي هياخدوا 4 مليون متر وزيهم في المرحلة الثانية، اما المرحلة الثالثة فهياخدوا 2 مليون زي ما بنعمل عند تخصيص المساحات الكبيرة.
وعلى فكرة شركة تيدا الصينية بتشتغل في مصر من 17 سنة قدروا خلالهم يطوروا أكثر من 7 مليون متر مربع أراضي في مدينة العين السخنة، وده الي خلى المنطقة الاقتصادية لقناة السويس توافق على تخصيص 3 مليون متر مربع للشركة مؤخرًا.
جمال قال عندنا تقريبا 220 مصنع صيني بمنطقة تيدا، بس احنا بنسعى لرفع العدد ده ل1000 مصنع في سنة 2030، وقال أن في المنطقة هيركزوا على الاستثمارات في التكنولوجيا والسيارات والغزل والنسيج.
طب ليه الصين بالذات اللي دولة هتديها كل مساحة الأراضي دي كلها؟
الإجابة ببساطة أن حجم الاستثمارات في المنطقة الاقتصادية لقناة السويس وصلت آخر 3 سنين ل8.3 مليار دولار، الصين لوحدها بتستثمر فيهم 4 مليار دولار، يعني النص تقريبا.
وده اللي أكده جمال في نفسه لما قال أن 40 % من الاستثمارات المنفذة داخل نطاق المنطقة الاقتصادية لقناة السويس آخر 3 سنين صناعة محلية و60% أجنبية، الصين لوحدها بتسيطر على أكثر من 60% من الاستثمارات الأجنبية، فالحقيقة أن الصين هي اللي بتسعى تعزز علاقاتها التجارية مع مصر واحنا بندعم ده.
عشان كده رئيس الهيئة لازم يكون فيه بنك صيني داخل السوق المصري عشان يساعد الشركات الصينية على التعامل بعملتها الخاصة، و فتح أفق سياحية وتعزيز التجارة بين البلدين، بس لحد دلوقتي محدش عارف تفاصيل كتير عن البنك ده كل اللي قاله رئيس الهيئة أننا بنتمنى فتحه قريب في مصر.
وعلى فكرة الدولة وفرت إمكانية فتح حسابات بعملة اليوان الصيني في مصر وده ساعد بعض الشركات الصينية في استخدام عملتها المحلية داخل المنطقة الاقتصادية.