إعفاء الألبان الأمريكية من شهادة حلال.. قرار خطير ولا خطوة اقتصادية مهمة؟
هو احنا هناكل لحم خنزير؟ أو هل هنستخدم منتجات داخلة في صناعتها كحوليات؟ .. تساؤلات كتيرة وجدل كبير على السوشيال ميديا وبين بعض دوائر رجال الصناعة والمواطنين، بعد إعلان رئيس الوزراء إعفاء منتجات الألبان الأمريكية من شرط الحصول على شهادة حلال عند دخولها السوق المصري.
هل القرار ده اتفهم غلط؟ ، وهل هو تنازل عن شروط دينية أو إنه بيميز المنتج الأجنبي على حساب المحلي؟
ايه هي شهادة حلال أصلا؟ وايه أهميتها وايه كمان أهم منتجات الألبان اللي بنستوردها من أمريكا؟ ومين الشركات اللي وراها؟
كل الأسئلة دي هنجاوبكم عليه في الفيديو دا.. يلا بينا
هي إيه شهادة حلال؟
شهادة حلال ببساطة هي وثيقة بتأكد إن المنتج، خاصة لو غذائي أو فيه مكونات حيوانية، مطابق لتعاليم الشريعة الإسلامية.. يعني مفيهوش خمور، أو لحم خنزير، أو أي مواد محرّمة شرعا.. الشهادة دي مهمة جدً خصوصا لو المنتج ده هيتصدر لدول إسلامية أو بيتباع في أسواق عربية بتحترم المعايير دي
ليه تم إعفاء منتجات الألبان الأمريكية؟
طيب إيه اللي حصل؟ وليه تم إعفاء منتجات الألبان الأمريكية منها؟
هقولك يا سيدي ..
رئيس الوزراء الدكتور مصطفى مدبولي، خلال المنتدى الاقتصادي المصري الأمريكي، أعلن إن الحكومة قررت إعفاء منتجات الألبان ومشتقاتها اللي جاية من أمريكا من شرط الحصول على شهادة حلال.. وقال إن ده جزء من تعزيز التعاون التجاري مع أمريكا، وإن مصر قدمت إخطار رسمي لمنظمة التجارة العالمية بالخطوة دي في مارس اللي فات
القرار ده مش من فراغ، ده جاي بعد شكاوى من بعض الشركات الأمريكية، اللي شايفة إن الإجراءات بتاخد وقت وتكلفة زيادة، وده بيأثر على التجارة بين البلدين
طب هل الحكومة سايبة السوق كده؟
المستشار محمد الحمصاني، المتحدث باسم مجلس الوزراء، طلع وضح الموقف وقال إن الحكومة في نفس الوقت بدأت تراجع منظومة شهادة الحلال كلها، وقررت:
فتح الباب لجهات أكتر تطلع شهادة حلال بدل ما كانت جهة واحدة بس هي اللي مسيطرة عليها وهي هيىة سلامة الغذاء
وده معناه منافسة أكتر، وسرعة في الإجراءات، وكمان أسعار أقل، كمان الحكومة بتدرس تخفيض الرسوم اللي كانت بتدفعها المصانع علشان تحصل على الشهادة
طب القرار ده هيأثر على السوق المصري إزاي؟
أول حاجة.. القرار مش معناه إننا هنقبل أي حاجة بدون رقابة لأن وزارة الزراعة لسه بتتابع الجودة والمواصفات
تاني حاجة .. لما الإجراءات تبقى أسهل، والرسوم تقل، ده معناه إن المصانع المصرية كمان هتقدر تصدر منتجات أكتر وبسهولة
تالت حاجة.. في الآخر، كل ده هيأثر بالإيجاب على المواطن، لأن المنتجات هتوصل أرخص وأسرع
طيب إيه أهم منتجات الألبان اللي بنستوردها من أمريكا؟ ومين الشركات اللي وراها؟
أهم منتجات الألبان اللي مصر بتستوردها من أمريكا بتتنوع ما بين اللبن المجفف، واللي بيستخدم في تصنيع الجبنة والزبادي والحلويات، لحد الجبنة الشيدر والموزاريلا اللي بيدخلو في مطاعم البرجر والبيتزا بشكل أساسي..
فيه كمان مكونات تانية زي بروتين مصل اللبن او اللي بيسموه الواي بروتين والكازين، ودي بتدخل في الصناعات الغذائية والمكملات وكمان بعض أنواع الزبدة والكريمة، وإن كان بنسب أقل، بتتستورد لاستخدامها في الحلويات والمطاعم
أما عن الشركات اللي ورا المنتجات دي، فأشهرهم في أمريكا شركات زي Dairy Farmers of America وLand O’Lakes اللي بيوردوا اللبن المجفف والزبدة، وKraft Heinz وLeprino Foods اللي متخصصين في الجبنة خصوصًا الموزاريلا.. وفيه شركات زي Hilmar Cheese بتورد مكونات صناعية زي الواي بروتين، وكمان Nestlé USA اللي بتقدم منتجات خاصة بالتغذية العلاجية والأطفال.
فمهم ناخد بالنا .. إن شهادة حلال لسه موجودة، ولسه مهمة، والدولة ماشيه في تنظيمها مش إلغائها والقرار اللي حصل خاص بمنتجات معينة وجاي في إطار اتفاقات تجارية دولية، مش تنازل عن مبادئ.. وفي المقابل، الحكومة شغالة على إصلاح جذري في المنظومة دي لصالح المصانع والمستهلكين.
