هتبيع تليفونك البايظ بألف جنيه.. الخردة كنز في بيتك أوعى ترميه
اكيد صادفك في يوم من الأيام وانت ماشي في الشارع ناس بتجمع البلاستيك والحديد من الزبالة، وطبعا ممكن تفتكر أنهم بيكسبوا ١٠ ولا ٢٠ جنيه منها بس الحقيقة أن الموضوع ده حرفيا بيكسب دهب
وده لان اي حاجة من اللي بيلموها سواء بلاستيك بقى أن معدن كل ده بيكسب مبالغ محترمة خصوصا لو معاك كمية كبيرة منها، يعني من انهاردة اي حاجة عندم في البيت مش عايزها فكر ١٠٠ مرة قبل ما ترميها لانك هتحتاجها بعدين
زي ازازة الزيت الفاضية أو ازايز الحاجة الساقعه ولا حتى الغطيان بتاعتهم كله بيتباع، وعموما في واحد من تجار الخردة كشف عن اسعار الخردة الموجودة في بيتك وانت بترميها كل يوم
الراجل ده قال إن ازازتين الزيت البلاستيك الفاضية بيتباعوا بجنيه، وعلبة مزيل العرق الالومنيوم ب6 جنيه، كمان الغطا بتاع ازايز المياه والبيبسي بيتباعوا ال5 غطيان بجنيه، وقال أن إزازة البيبسي الفاضية ال2 لتر بجنيه ونص، اما علبة الكانز بجنيه
ولو عندك بقى قلب كالون قديم او قلب الطبلة بايظ مش بتستخدمه اوعى ترميه لانك هتبيعه ب50 جنيه، كمان لو عندك حنفية قديمة هتبيعها ب35 جنيه بس السعر ده الحنفية الكبيرة، والاصغر منها ب28 جنيه
ده حتى اللمبة المحروقة اللي على طول اول ما بتبوظ بترميها هي كمان بتتباع حتى لو نوع مش كويس ودي الكيلو منها ب25 جنيه، أما بقى لو عندك نوع احسن شوية من اللمبات دي هتبيع الكيلو منها ب80 جنيه
لا ده كمان التليفونات اللي فقدت الامل فيها ومش عارف تصلحها برضو هتبيعها وياسلام بقى لو عندك ٢ ولا٣ منهم هتبيعه الكيلو ب220 جنيه، بس لو هتبيع البوردة الداخلية لوحدها هتبيع الكيلو بالف جنيه لأنها أغلى بكتير وبيحتاجوها في قطع الغيار، مستنى ايه قوم دلوقتي دور على اي تليفون وروح بيعه
بس قبل كده لو عندك بقى كوباية ولا طبق ازاز اتكسر خدهم معاك وبيعهم برضو لان الكيلو بيتباع بجنيه وربع والألوان منها بجنيه، أما البلاستيك وتحديدا علب الايس كريم الكبيرة الواحدة منها بيتباع بجنيه وربع
كل دي حاجات بيجمعوها النباشين أو الناس اللي بتشوفهم كل يوم بيجمعوا البلاستيك من الزبالة بيبعوها وبيكسبوا من وراها مبالغ كبيرة اوي، وانت بكل بساطة بترميها من غير ما تعرف قيمتها
بس من انهاردة خالي بالك كويس اوي واوعى ترمي اي حاجة منهم في الزبالة، لان الخردة فعلا كنز اوعي ترميه
انت بقى عندك ايه من الحاجات دي في بيتك؟ وعمرك فكرت تبيع حاجة منهم؟