بينوروا بيوتهم بـ50 جنيه.. البسايسة أول قرية تشتغل بالطاقة الشمسية!

من بعد أزمة الكهرباء وناس كتير بقت تفكر تشوف بدايل، وفعلا دلوقتي الكل بدأ يتجه للطاقة الشمسية ومصادر تانية كتير تغنينه عن الكهرباء، بس الحقيقة أن فيه قرية موجودة في مصر استغنت من زمان عن الكهرباء بشكل كامل وبدأت تتجه لبديل تاني احسن واوفر بكتير

البسايسة الموجودة في الشرقية حكايتها بدأت من ٥٠ سنة لما جه واحد من أبناءها وحب يطبق تجربة انشاء محطة طاقة شمسية فيها بدل من الكهرباء، طبعا في البداية الأهالي مقتنعوش بالفكرة لكن مع الوقت قرروا أنهم يجربوها خصوصا انهم كان عندهم مشكلة في الكهرباء 

وفعلا تم تنفيذ أول محطة طاقة شمسية بعد ما جه للقرية أستاذ فيزياء من الجامعة الأمريكية، وجاب لهم نماذج صغيرة عشان يوصلهم المعلومة، وبكل بساطة قالهم أن أهم ميزة في المشروع توفير فاتورة الكهرباء اللي كان بيعاني منها ناس كتير 

وكل ده على ايد محمد عرفة استاذ الفيزياء بالجامعة الأمريكية، وعرفة هو رائد التنمية البيئة فى مصر، وأول اللي استخدم الطاقة الشمسية وإعادة التدوير في المناطق الريفية لإنتاج الطاقة الحيوية للاستفادة من الموارد الطبيعية  لمجتمعات صديقة للبيئة في الريف

طنطاوي السيد، مسئول الطاقة الشمسية في جمعية تنمية مجتمع قرية البسايسة،  قال إن الجمعية نموذج مثالي لإنتاج الطاقة النظيفة، و بتشتغل  خلال ٦ ساعات بالطاقة الشمسية،  كمان بيوت أهالى القرية والبيوت اللي حواليها، بيستفيدوا من الطاقة الشمسية مقابل أجر شهرى 50 جنيه لكل شقة، كمان مسجد القرية المجاور لمقر الجمعية برضو بيشتغل بالطاقة الشمسية 

صيت القرية مش بس سمع في المحافظة بس لا ده سمع في مصر كلها لدرجة أن فيه ناس من أصحاب المصانع بقوا يجوا من محافظات مختلفة زي سينا والسلوم والمحافظات اللي بتعاني من ضعف كهرباء عشان يقدروا يستفيدوا من التجربة بتاعتهم

وعلى فكرة القرية مش بس بتعتمد على الطاقة الشمسية هما كمان بيستفادوا من الطاقة الجديدة والمتجددة، سواء الطاقة الشمسية أو طاقة الرياح أو إنتاج البيوجاز كمان بيستفادوا من المخلفات الصلبة، وبينتحوا الأعلاف غير التقليدية للحيوانات، أو البيوجاز باستخدام روس الماشية

القرية فعلا تستحق أن تجربتها تنتشر في كل مكان وده طبعا هيحل أزمة الكهرباء اللي بنعاني منها كل صيف 

ودلوقتي قولنا جربت تشغل بيتك بالطاقة الشمسية؟