عملة جديدة.. اتفاق جديد بين مصر وروسيا للقضاء على الدولار!

واضح كده أن السنين الجاية الدولار مش هيبقى ليه اي قيمه، وهيمنته على كتير من الدول خلاص هتنتهي يعني الدولار طلع بقى ولا نزل مش هيهمنا كتير، وده لان فيه قرار مصيري اخدته مصر وروسيا هيحل أزمة كتير واولها أزمة نقص العملة اللي بنعاني منها 

بس ايه هو القرار ده؟

شوف يا سيدي، مصر وروسيا خلاص اتفقوا أنهم يتعملوا بالعملة المحلية بتاعتهم، يعني لو حصل استيراد أو تصدير بينهم يا يبقى بالجنيه المصري أو بالروبل الروسي،.طبعا دي خطوة مهمه جدا ليها توابع كتير زي التخلي عن الدولار وقلة التكاليف

وطبعا لو دول كتير طبقت النظام ده مع الوقت هيمنة الدولار هتختفي بشكل نهائي، لان ببساطة كل دولة هتتعامل بعملتها يعني  مش هتختاج عملة صعبة عشان تستورد اللي محتاجه 

وزير الصناعة والتجارة الروسي أنطون عليخانوف، علق على الخطوة دي وقال إن مصر وروسيا بتسوي 40% من معاملاتهما التجارية المشتركة بعملات تانية زي اليورو والدولار.

بس باقي المعاملات بتم بالعملات المحلية، وطبعا الفترة الجاية النسبة دي هتزيد خصوصا أن التجارة بين مصر وروسيا زادت بنسبة 32% السنة اللي فاتت ووصلت ل9 مليار دولار ودي  أعلى نسبة وصلتلها البلدين 150% من 5 سنين فاتوا

خليني اقولك أن السبب الأساسي اللي خلى مصر تاخد الخطوة دي هو أزمة العملة اللي مرت بيها من سنة 2022، واللي سببت ارتفاع كبير جدا في الأسعار وانتشار الأسواق الموازية وارتفاع سعر الدولار بشكل مبالغ فيه

طبعا الخطوة دي هتخلي مصر متشليش هم ارتفاع سعر الصرف أو تقلبات تحصل بسبب الضغوط العالمية، لأنها كده مامنة نفسها بالعملة بتاعتها مع الدول التانية، طبعا ده في حالو أن مصر اتفقت مع دولة تانية على النظام ده

وده على فكرة الهدف الأكبر من مجموعة البريكس حاليا اللي بتضم اكتر من دولة حاليا واللي مصر منهم وهو الخروج من سيطرة الدولار وهيمنته الاقتصادية، والتعامل يا بالعملات المحلية للدول الأعضاء أو بطرح عملة موحدة للمجموعة فيما بعد عشان كل دولة تضمن استقلالها الاقتصادي والمالي، وتبعد عن الضغوط اللي بتمارسها الولايات المتحدة باستخدام الدولار على الدول.

والحقيقة أن الرئيس الروسي فلاديمير بوتين اول واحد ياخد الخطوة دي وفي اجتماع من  اجتماعات قمة بريكس الـ 16، استعرض نسخة من عملة أطلق عليها عملة بريكس، وده وقتها أثار ضجة إعلامية كبيرة في الغرب، خصوصا أن لسه طرح العملة سابق لأوانه الدول لسه بتتنافش عن طريقة التعامل بالعملة الموحدة 

بس ترامب بعدها مسكتش وحذر كل دول البريكس أن لو استبدلوا الدولار هيفرض رسوم جمركية بنسبة 100% 

وقال أننا هنطلب من الدول دي يبعدوا عن عملة البريكس، وميدعموش اي عملة تانية مكان الدولار ولو ده حصل الدول دي هتواجه رسوم جمركية بنسبة 100%"

شاركنا بتعليقك تفتكر ممكن يجي اليوم اللي الدول فيها تستغنى عن الدولار؟