اتسرق منها كنز علي بابا.. نوال الدجوي جابت فلوسها منين؟

المصريين كلهم اتفاجئوا من ساعات بأكبر قضية سرقة سمعوا عنها، اكتر من ربع مليار طاروا في ليلة واحدة من بيت نوال الدجوي الاسم اللي بقى على لسان كل المصريين بعد ما عرفوا اللي حصلها 

اكتر من 50 مليون جنيه مصري، و3 مليون دولار أميركي، و15 كيلو ذهب، اتسرقوا من شقتها، أو من مغارة على بابا زي ما الكل بيقولوا عليها دلوقتي اصل مين كان يصدق أن كل ده كان موجود في بيت رئيسة جامعة 

بس ياترى مين هي نوال الدجوي وجابت فلوسها دي كلها منين؟

قبل ما اقولك جابت فلوسها منين خليني اعرفك الاول مين هي نوال ونوال  هي واحدة من  أبرز الشخصيات المؤثرة في مجال التعليم الخاص في مصر، تقدر تقول انها وهبت حياتها للتعليم وازاي تطوره عشان ينافس احسن أساليب التعليم في العالم 

مسيرة نوال بدأت سنة 1958 لما أسست  أول مدرسة لغات مصرية وكان ساعتها  عندها 21 سنة،  في الوقت ده كانت فيه المدارس الأجنبية لسه بتبدء تنتشر في مصر .

نوال أسست كمان مدارس "دار التربية" وجامعة أكتوبر للعلوم الحديثة والآداب، اللي تعتبر من أهم الجامعات الموجودة في مصر دلوقتي واللي بيدخلها اولاد رجال الأعمال وصفوة المجتمع 

 وتم تكريمها من الرئيس عبدالفتاح السيسي سنة 2019 كواحدة من النماذج النسائية المشرفة في مصر

والجميل في نوال أنها بتعامل الطلبة مش زي اي مدير جامعة لا دي بتعتبرها أنهم اولادها وكل الطلبة بتحبها لدرجة أنها معروفة وسطهم بماما نوال 

أما بالنسبة للمبلغ الضخم اللي اتسرق منها واللي قالب مصر كلها فنوال قالت إنه ده جزء من ميراثها موجود في فيلتها من سنين بعد ما حصل تقسيم الميراث بينها وبين العيلة

والساعات الأخيرة دكتورة نوال اكتشفت سرقو كل المبالغ دي لما جربت تفتح خزنتها ومعرفتش، وساعتها شكت في الأمر لحد ما تأكدت فعلا انها اتسرقت وبلغت البوليس

ولحد دلوقتي التحقيقات شغالة بس التحريات الأولية اكتشفت أن اللي سرق الشقة واحد من المترددين عليها وعارف الدكتورة وكل تفاصيل الفيلا كويس اوي، لان مفيش اي اثار هجوم أو عنف في مداخل الفيلا، ده غير ان اللي سرق كان عارف مكان الفلوس فين، كمان هي اتهمت واحد من قرايبها ورا سرقتها.