شبكات الـ 5G في مصر.. لما شركات المحمول تدفع 2.7 مليار دولار عشان حلم الحكومة
فاكر أول مرة جربت فيها تتفرج على فيديو على تليفونك؟ كان بيهنج؟ بيقطع؟ النت بيزوغ منك؟ .. أهو ده كان الجيل التاني والتالت والرابع، بس دلوقتي... إحنا دخلين على حكاية تانية خالص
جيل خامس.. يعني إنترنت طيارة.. مش بس كده، ده الإنترنت اللي هيغير شكل حياتك وشكل اقتصاد بلد كاملة .. دا جايلك من عشان يسرعلك اليوتيوب بس.. ده جاي يسرع البلد كلها .. عشان تمشي بسرعة الصاروخ
والغريب بقى أن الحكومة اللي بتحلم.. وشركات المحمول اللي بتدفع..
النهارده، شركات المحمول في مصر دفعت 2.7 مليار دولار عشان تبدأ تشغيل شبكات الجيل الخامس.. السؤال هنا: ليه؟ .. هل ده عشان عيونك؟ .. ولا في خطة أكبر بكتير؟
الحقيقة يا سيدي أن الحكومة عندها حلم رقمي.. ومش سايباه للظروف والهدف.. تحول رقمي شامل.. وشبكات سريعة.. واقتصاد مبني على الـ Data مش الطوب والرمل
اللي لاازم ندركه أن شبكات الجيل الخامس مش "واي فاي أحسن"، لأ .. ده إنترنت ممكن يدير مصنع كامل، أو عربية تمشي من غير سواق، أو جراح يشتغل من أمريكا ويعمل عملية في مريض في مستشفى في المنصورة.. يعني اقتصاد جديد بالكامل بيتخلق
وده بيفسر ليه شركات المحمول كانت مستعدة تدفع مليارات.. لأن ده سوق جديد، ومكاسب جديدة، وتحكم في مستقبل الخدمات كلها.
ولو بصينا على اللي بيتعمل في مصر دلوقتي هنلاقي أن الاستثمار في شبكات الجيل الخامس مش هزار.. والرقم مش قليل دا .. 2.7 مليار دولار .. من أول 2019 لحد النهارده عشان الترددات والتراخيص بس؟!
آه، الرقم كبير.. بس مش أكبر من الطموح .. البلد دي قررت إنها تدخل السباق من بابه الكبير، مش من الشباك وكل خطوة في الموضوع مدروسة.. من أول تطوير البنية التحتية، لحد وصول الفايبر لكل شارع وبيت
طبعا هتقول هنا .. يعني مصر هي سبع البورمبة اللي بيعمل شبكات جيل الخامس.. طيب ما العالم كله شغال على أحدث منها كمان؟ .. فالحقيقة مصر مش لوحدها... والمنافسة مولعة
في المنطقة مثلا .. السعودية بدأت، والإمارات بتجرب، ونيجيريا سبقت، وأوروبا بتطور.. بس مصر عندها الكارت الرابح وهو السوق الكبير ،الشباب، الرؤية الحكومية.. وده اللي بيخليها تستضيف منتدى تكنولوجيا الجيل الخامس ومهم نعرف أن اللي حصل مجرد بداية... مش نهاية ولا حتى نص القصة
الملحوظة المهمة واللي لازم ناخد بالنا منها كمان أن الأمن القومي دلوقتي مش بس صواريخ .. لما تبقى كل حاجة متوصلة بالنت: عربيتك، بيتك، شغلك، المستشفى، وحتى الزرعة اللي بترويها بالموبايل.. يبقى لازم الشبكات دي تكون آمنة، ومبنية في مصر، وتخضع لرقابة الدولة.
وده سبب رئيسي إن الحكومة بتشتغل على حاجة اسمها Open RAN.. يعني شبكات بتسمح بالتنافس، وتقلل الاحتكار، وتخلينا نعتمد على نفسنا أكتر
احنا دلوقتي بقى قدام رؤية دولة حديثة متقدمة عينها على المستقبل وبتقول بأقوى صوت: إحنا مش جايين نلحق العالم، إحنا جايين نبقى من اللي بيقودوه قطر التنمية في المنطقة وشركات الاتصالات فهمت الرسالة، واستثمرت بالمليارات، لأن الكراسي قدام بتتكلف غالي.. بس تستاهل
مهم نعرف أن اللي حصل مش سباق سرعات في إنترنت.. اللي حصل خطة دولة ماشية على الأرض بخطوات واثقة، وعارفة هي رايحة فين .. وسواء كنت بتفهم في التكنولوجيا أو لأ.. خليك متأكد إن الجيل الخامس مش جاي عشان يسرعلك اليوتيوب بس.. ده جاي يسرع البلد كلها .. عشان تمشي بسرعة الصاروخ
