مشروع القرن.. سياحة وشغل وحج.. إيه حكاية الجسر البري بين مصر والسعودية
صاحبك وحشك، أخوك عازمك، حابب تأخد مامتك، بتنقل بضاعة، رايح سياحة؟ .. كل اللي انت عايزه من السعودية أو مصر، مش محتاج أكتر من 20 دقيقة وتكون هناك .. وأرخص بكتير من الطيران أو العبارات.
جسر الملك سلمان.. مش بس جسر.. ده "خط حياة" بيربط بين مصر والسعودية .. طوله 50 كيلومتر، هيبقى الشريان اللي بيربط قارتين آسيا وإفريقيا، وتحديدًا من رأس نصراني في شرم الشيخ لغاية رأس الشيخ حميد قرب تبوك في السعودية، مرورًا بجزيرة تيران.
الجسر ده مش حلم.. ده مشروع جاهز فنيًا بكل الرسومات والخطط، زي ما أعلن وزير النقل الفريق كامل الوزير. والتكلفة؟ حوالي 3 مليار دولار، وده رقم هيتجاب في أقل من 10 سنين!
ودي حاجة شبه مستحيلة في مشروعات البنية التحتية اللي ممكن تاخد 30 أو حتى 40 سنة عشان تسترد تكلفتها
طيب ايه الحكاية والقصة والتفاصيل هنحكيها لكم في الفيديو:
الجسر البري بين مصر والسعودية هيولع السوق حرفيًا؟ خليني أقولك بالأرقام والحكايات:
1- تصدير النفط بشكل أسرع وأرخص
لأن السعودية بتصدر يوميًا أكتر من مليون ونص برميل بترول لأوروبا.. ودلوقتي، لو النفط ده اتنقل عبر الجسر بأنابيب لحد خط سوميد المصري، ومنه لميناء سيدي كرير في الإسكندرية، بدل ما يلف بالسفن حوالين أفريقيا أو يزاحم في قناة السويس، هنوفر مليون ونص دولار يوميًا .. ده غير رسوم عبور بتاخدها مصر، من غير ما تتأثر قناة السويس.
كمان، الجسر هيخلينا نستغنى عن ناقلات البترول العملاقة اللي غاطسها كبير ومابتدخلش قناة السويس أصلاً
2- تجارة وشحن وشاحنات وفلوس بالكوم تدخل الجمارك
لأن الجسر هيبقى ممر أرضي للشاحنات بين المشرق والمغرب العربي,. فتخيل شاحنة طالعة من عمان رايحة تونس؟ كانت لازم تاخد طيارة أو عبارة، لكن دلوقتي ممكن تمشي على الأرض بالجسر
3- حركة الناس
يعني حجاج، معتمرين، عاملين، سياح، طلبة.. الجسر هيفتح الباب أمام ملايين الناس يتنقلوا بسهولة، وبدل ما تحجز طيارة غالية أو تستنى العبارة بالساعات، هتسوق عربيتك وتعدي الجسر في 20 دقيقة.
طيب المسافة من الرياض للقاهرة هتبقى قد ايه؟ .. هتبقى من 18 إلى 20 ساعة بالعربية شاملة الراحة والجمارك، بدل يومين كاملين بالطيران والانتظار.
طيب السؤال هنا.. ازاي تسافر بالعربية وتزور قرايبك بسهولة؟
تخيل المشهد: أنت سايق عربيتك من جدة، تعبر الجسر في دقائق، وتشرب قهوتك في شرم الشيخ ,, لو عايز تكمل للأقصر أو الإسكندرية؟ كله متاح، والطريق مفتوح، والرحلة ممتعة.
الرحلة من الرياض لشرم الشيخ هتكون حوالي 12 إلى 15 ساعة (حسب سرعتك)، ولو مكمل للقاهرة، ضيف عليها 5 أو 6 ساعات، يعني 18-20 ساعة في المجمل.. ده غير إنك بتتحرك بحريتك، مع أهلك، ومن غير توتر المطارات أو تأخير العبّارات.
طيب ايه مراحل تنفيذ الجسر ؟
بص هما 3 خطوات جبارة .. الأول كوبري معلق بين الشاطئ المصري وجزيرة تيران – طوله 2.5 كم، وارتفاعه 65 متر زي كبارى العالم
بعدين طريق بري على جزيرة تيران – 5 كيلومتر.
بعدين جسر فوق مياه ضحلة حتى الشاطئ السعودي – 14 كيلومتر، بتقنيات ذكية تجمع بين الجسور المعلقة والتقليدية والركامية
وده كله على ارتفاع 65 متر فوق سطح البحر عشان ميأثرش على الملاحة في خليج العقبة .. يعني لا هنعطل السفن، ولا هيكون فيه اعتراضات دولية على المرور الملاحي.
عايز أقولك كمان أن المشروع هيخلق فرص عمل ضخمة..
لأنه هيوفر آلاف فرص الشغل في قطاع المقاولات والبناء في البلدين، سواء بشكل مباشر أو عبر شركات من الباطن، ده غير فرص التشغيل والإدارة والسياحة والتجارة بعد افتتاح الجسر وكل ده بشراكة مصرية سعودية، بمساعدة شركات عالمية.
الجسر مش هينفع اقتصاديًا بس، ده كمان هيرسخ مكانة مصر والسعودية كمركز لوجيستي عالمي بيربط بين الشرق والغرب لأنه ممكن يضاعف التبادل التجاري بين البلدين لـ 13 مليار دولار سنويًا في أول سنتين بس من افتتاحه
طيب السؤال هنا .. امتى نشوفه فعليًا .. الحقيقة دا قرار بقى القيادات السياسية في البلدين لأنه مطروح من 1988 بس اللي يفرق دلوقتي أن التخطيط الفني جاهز وكل حاجة بتقول يلا نبدأ .. تفتكر امتى نشوفه حقيقة قدامنا؟
