هيخليك تستغنى عن التليفون.. جهاز جديد من open Ai هيقلب العالم!
واضح كده أننا داخلين على ثورة تكنولوجيا مشوفنهاش قبل كدا، ابتكارات جديدة وأجهزة بمواصفات فوق الخيال محدش كان يتخيل أنها ممكن تكون موجودة على أرض الواقع
وده هيكون على ايد شركة Open AI اللي انضمت الفترة الأخيرة لعالم الأجهزة، بعد ما استحوذت على شركة io Products، ودي شركة ناشئة سرية متخصصة في أجهزة الذكاء الاصطناعي، شارك في تأسيسها رئيس قسم التصميم السابق في Apple، جوني إيف، في صفقة ضخمة بقيمة 6.5 مليار دولار
الشركة دي يا سيدي عملت جهاز محدش عارف ده ايه لحد دلوقتي والشركة مش راضية تكشف تفاصيل كتير عنه، لكنها بتقول أن الجهاز ده هيخلينا نستخدم الذكاء الاصطناعي بشكل يومي، واول ما ينزل السوق هيعمل قلبان في العالم كله زي ما حصل وقت ما الايفون نزل من 14 سنة لحد انهاردة والناس بتشتري كل اصدار جديد ينزل منه
بس الجهاز ده مش هيكون منافس للايفون ولا سوق التليفونات اصلا لانه مش تليفون ده جهاز من غير شاشة لمس تصميمه زي جهاز iPod Shuffle من أبل بس طبعا هيحصل شوية تغييرات في التصميم قبل ما يبدأو في إنتاجه
وحسب معلومات مسربة من المحلل مينغ-تشي كو، أن الجهاز مصمم عشان يتلبس حولين الرقابة وفيه كاميرات وميكروفونات عشان تساعدك تتعرف على البيئة اللي حواليك.
وزي ما قولنا الجهاز مفيهوش شاشة عرض هو هيعتمد على الاتصال بالهواتف الذكية أو أجهزة الكمبيوتر عشان تقدر تتحكم فيه من خلال شاشاتهم
ومتوقع أن الجهاز ده يبدأ في سنة 2027، و هيتم تجميع الجهاز وشحنه خارج الصين مع وجود احتمالية كبيرة عشان تكون فيتنام هي موقع التجميع، والغريب أن مفيش اي توقعات بنجاح أو فشل الجهاز ده خصوصا أن مخترعه كان فشل قبل كده في اختراع جهاز يشبه ده
وعلى فكرة الهدف من فكرة الجهاز ده هو تقليل الاعتماد على الشاشات والانشغال المستمر بيها، عشان يكون وسيلة تفاعلية اكتر مع كل اللي حواليك، خصوصا أن التليفونات دلوقتي ممكن تقعد قدامها بالساعات وتنسي الناس اللي حواليك بسببها
وبالمناسبة لو متعرفش ايه هي شركة أوبن إيه آي فدي شركة تناسيت من 10 سنين كمؤسسة بحثية، بس اتحولت لقوة رائدة في الذكاء الاصطناعي بعد إطلاق "تشات جي بي تي" خلال 2022.
وساعتها ارتفعت قيمتها السوقية ل 300 مليار دولار، وتسعى حالياً لتوسيع حضورها من خلال عمليات استحواذ، من بينها صفقة بقيمة 3 مليارات دولار لشراء شركة "ويندسيرف" (Windsurf) المتخصصة في برمجيات ترميز الذكاء الاصطناعي.
ودلوقتي قولنا رايك في الجهاز الجديد من open Ai؟