يا ويلك يا ترامب.. 5 قنابل نووية اقتصادية في يد الصين تحسم الحرب التجارية لصالحها

في الوقت اللي العالم كله كان مستني انفراجة في حرب الرسوم الجمركية بين أمريكا والصين، حصلت مفاجأة كبيرة.. التنين الصيني اللي كان ساكت لفترة طويلة، ناوي ينفخ في نار الصراع دي من تاني، وعلى ما يبدو، المعركة دي هتكون أكبر بكتير من اللي اتوقعناه..  5 قنابل اقتصادية نووية ممكن تزلزل عرش ترامب لو متراجعش عن الرسوم الجمركية.

5 قنابل نووية اقتصادية دول هيزلزلوا السوق الأمريكي كله، يعني، الصين جاهزة ترد ضرباتها وتخلي أمريكا تتحرك، لكن السؤال الكبير هو: هل هيرجعوا عن المواقف دي؟ لو ترامب فاكر أنه ممكن يسيطر على الموقف، الصين مش هتسيبه على راحته.. والحل الوحيد هو الجلوس على طاولة المفاوضات، لأن الوضع بيقترب من نقطة ما فيهاش رجعة

القنبلة الأولى - خفض اليوان

أول سلاح في ترسانة الصين هو خفض قيمة اليوان وده السلاح اللي الصين بتلعب بيه من زمان، واللي بيخلي منتجاتها أرخص في السوق العالمي، يعني لما اليوان ينزل، الصادرات الصينية بتزيد، والمصانع شغالة بأقصى طاقتها، لكن المواطن الصيني هيدفع التمن .. لكن في العموم الصين مش هتخسر كتير لو اللعبت باليوان، لكن أمريكا هتشوف هبوط رهيب في قيمة عملتها قدام اليوان

القنبلة التانية - سوق السندات الأمريكية

سوق السندات الأمريكية، ده سلاح تاني الصين ممكن تستخدمه، لأن بكين هي تاني أكبر دائن لأمريكا، وده يعني لو قررت بكين تبيع السندات دي، هتسبب انهيار كبير في سوق السندات الأمريكية، كل ده هيسبب ارتفاع في تكاليف الاقتراض لواشنطن، ويضغط على ميزانيتها اللي أصلاً في أزمة.

القنبلة الثالثة - الشركات الأمريكية في الصين

الأسلحة دي مش بس على مستوى الاقتصاد الكلي، الصين كمان ممكن تروح تضغط على الشركات الأمريكية في الصين، زي ما حصل في 2023 لما فرضت غرامات على الشركات الأمريكية، لو الصين قررت تضغط أكتر، ده ممكن يخلي الشركات الأمريكية تضطر تترك السوق الصيني، اللي تعداد سكانه تجاوز المليار ونصف نسمة وده هيؤثر على الاقتصاد الأمريكي بشكل كبير.

القنبلة الرابعة - المعادن النادرة

وهنا نيجي للسلاح الأقوى والمتفرد في يد بكين، لأنها تسيطر على 70% من سوق المعادن النادرة، ودي مواد أساسية في الصناعات التكنولوجية والعسكرية، فلو قررت تقيد تصدير المعادن دي، ده هيتسبب في أزمة ضخمة في السوق الأمريكي، خاصة في صناعة التكنولوجيا المتقدمة، وفي تقديرات بتقول إن أسعار المعادن دي هتزيد بنسبة 40% قريبا.. ده معناه زيادة في أسعار الإلكترونيات والبطاريات، وكمان تأثير على الأمن القومي الأمريكي.

القنبلة الخامسة - الرسوم الجمركية الانتقامية

آخر سلاح هو سلاح ترامب، الرسوم الجمركية.. الصين هتقدر تفرض رسوم جمركية على المنتجات الأمريكية، خصوصا المنتجات الزراعية، واللي بتأثر بشكل مباشر على ولايات الحزب الجمهوري، من المعروف إن أمريكا بتصدر للصين حوالي 145 مليار دولار، أغلبهم من السلع الزراعية، لو الصين فرضت رسوم على السلع دي، ده هيكون ليه تأثير سياسي واقتصادي مباشر على ترامب وحملاته الانتخابية.

الأسلحة الاقتصادية دي كلها في يد الصين، والمفاجآت لسه ما انتهتش، السؤال اللي لازم نسأله دلوقتي هو: هل الصين هتقدر تزلزل العرش الأمريكي؟ وهل الحرب التجارية دي هتتحول لصراع اقتصادي عالمي؟ و إيه تأثير كل ده على حياتنا؟ وهل الصين جاهزة لتفجير المفاجآت دي؟ وهل فعلا هنشوف الاقتصاد الأمريكي يترنح قدام الضغوط الصينية؟

شاركنا برأيك وقولنا توقعاتك للحرب التجارية بين أمريكا والصين.