فلوسك هتروح عليك.. الرقابة المالية تحذر من كيانات غير مرخصة هتضحك عليك باسم الاستثمار في الذهب
بتفكر تستثمر فلوسك في الذهب .. بس هيئة الرقابة المالية بتحذر من عمليات نصب بتحصل تحت مسمى "الاستثمار في الذهب".. فيه شركات بتدعي إنها مرخصة من الهيئة لبيع الذهب مباشرة للمواطنين، لكن الحقيقة إن التراخيص دي مش موجودة!
إيه القصة؟
هيئة الرقابة المالية أصدرت تحذير واضح: هي مش بترخص لأي شركات تبيع ذهب مباشر للأفراد والتراخيص بتاعتها بتكون بس لصناديق الاستثمار اللي بتستثمر في الذهب بشكل منظم. يعني لو شركة قالتلك إنها مرخصة من الهيئة لبيع الذهب، فده كلام فاضي وممكن يكون نصب.
القانون بيقول إيه؟
حسب قانون سوق المال (رقم 95 لسنة 1992)، الهيئة بتكون مسؤولة عن تنظيم الاستثمار في الذهب من خلال وثائق صناديق الاستثمار فقط.. أما بيع الذهب المباشر، فده بيتحكم بقوانين تانية زي قانون المعادن الثمينة وقانون التجارة، ومش من اختصاص الهيئة.
موقف الهيئة؟
الهيئة بتحذر المواطنين من التعامل مع الشركات اللي بتدعي إنها مرخصة، وأكدت إنها هتتصدى بإجراءات قانونية صارمة ضد أي شركة بتخالف القوانين. يعني اللي بيحاول يضحك عليك هيتحاسب.
تاخد بالك إزاي؟
قبل ما تستثمر في الذهب، اسأل الشركة:
- عندك ترخيص من هيئة الرقابة المالية؟
- إنت صندوق استثمار رسمي ولا تاجر عادي؟
- فلوسي هتكون محمية إزاي؟
