أغنى 10 سيدات في العالم 2025.. فلوس بالمليارات تشتري دول ونجاحات بتكسر الدنيا
لما بنسمع عن أغنى أغنياء العالم، أول حاجة بتيجي في بالنا رجالة زي إيلون ماسك، جيف بيزوس، أو حتى وارن بافيت.. بس يا ترى فكرت قبل كده مين الستات اللي معاهم فلوس قد كده؟!
في 2025 ستات فعلاً معاهم فلوس تكفي دول .. واحدة طليقة أغنى أغنياء العالم وأخدت فلوس وممشياها تبرعات .. وواحدة تانية .. تلقب بـ ملكة الكازينوهات .. بس أستاذة في السياسة .. وغيرهم 8 آخرين .. هنقولكم عليهم ونحكي حكاية كل واحدة فيهم ..
يلا بينا .. أغنى 10 سيدات في العالم 2025
مجلة فوربس عملت تقرير في مارس 2025 عن أغنى 10 سيدات في العالم 2025 معاهم سوا حوالي 505 مليار دولار! آه والله… نص تريليون تقريبًا .. يعني لو عملوا شركة واحدة سوا، ممكن يشتروا بيها دول كاملة ويفضل معاهم باقي!
واللي يجنن إن الستات دول مش بس ورثوا الفلوس، لأ في كتير منهم بنوا نفسهم من أول وجديد، وعندهم شركات بتوظف آلاف
نبدأ بالمركز الأول… والملكة أليس والتون:
المركز الأول في أغنى 10 سيدات في العالم 2025 كان من نصيب الأمريكية أليس والتون، عندها 75 سنة، ومعاها رقم فلكي… 112 مليار دولار
بنت سام والتون، مؤسس سلسلة وول مارت، أكبر سلسلة سوبر ماركتات في العالم
يعني باختصار، كل مرة تشتري حاجة من وول مارت، أليس بتكسب قرشين
سهم الشركة طار السنة اللي فاتت، وده خلاها تكسب حوالي 28.7 مليار في سنة واحدة
المركز التاني: الجميلة والأنيقة من فرنسا… فرانسواز بيتنكور مايرز:
دي وريثة لوريال، عملاقة مستحضرات التجميل. عندها 71 سنة ومعاها 74.4 مليار دولار
بس للأسف، ثروتها نقصت شوية عن السنة اللي فاتت، وخسرت اللقب لصالح أليس
المركز التالت: جوليا كوك... الست الحديدية:
الأمريكية جوليا كوك، عندها 62 سنة، ومعاها 74.2 مليار
ورثت جزء كبير من شركة كوش إندستريز بعد وفاة جوزها ديفيد كوك سنة 2019
الشركة دي شغالة في كل حاجة: صناعة، طاقة، سلع… يعني ماشية زي القطر
المركز الرابع: جاكلين مارس – ستة وتمنها كتير:
85 سنة، ومعاها 42.3 مليار دولار، وهي من عيلة مارس بتاعة الشوكولاتة اللي كلنا بنحبها
اشتغلت في الشركة سنين طويلة، وكانت عضوة في مجلس إدارتها
المركز الخامس: الست اللي بتحرك سفن العالم
رافاييلا أوبونتي ديامانت، من سويسرا، 79 سنة .. ودي ثروتها حوالي 39 مليار، وده جاي من شركة MSC… واحدة من أكبر شركات الشحن في العالم.
المركز السادس: أبيجيل جونسون – ست بتمسك الفلوس صح
عندها 63 سنة، ومعاها 36 مليار .. وهي الرئيسة التنفيذية لشركة فيديليتي لإدارة الأصول
يعني مسؤولة عن استثمارات ناس بالمليارات، وبتدير الفلوس كأنها لعبة شطرنج
المركز السابع: أقوى ست في الهند… سافيتيري جيندال:
74 سنة، ومعاها 32.3 مليار... رئيسة مجموعة جيندال اللي شغالة في الحديد والطاقة
ست بمعنى الكلمة… بتدير إمبراطورية صناعية ضخمة
المركز التامن: ماكنزي سكوت مرات معلم التسويق
ماكنزي عمرها 54 سنة، ومعاها 32.3 مليار وكانت متجوزة جيف بيزوس، مؤسس أمازون، وخدت جزء من ثروته بعد الطلاق
بس المميز فيها إنها واحدة من أكبر المتبرعين ففي العالم .. بتتبرع بالمليارات وبتساعد جمعيات خيرية كتير جداً
المركز التاسع: ميريام أديلسون – الكازينوهات والطب والسياسة
79 سنة، ومعاها 31.5 مليار .. مالكة لاس فيغاس ساندز، من أكبر سلاسل الكازينوهات في أمريكا، كمان بتدعم أبحاث طبية وناشطة في السياسة
وأخيرًا… المركز العاشر: مارلين سيمونز:
74 سنة، ومعاها 31 مليار.. أرملة جيم سيمونز، مؤسس واحدة من أقوى شركات الاستثمار في وول ستريت، وبنت ثروتها من صناديق التحوط، وعندها عقلية مالية جبارة
الستات دول مش بس عندهم فلوس… عندهم رؤية، شغل، مجهود، وتأثير على اقتصاد العالم كله.. بيكسروا النمط التقليدي، وبيدونا مثال حي إن الست ممكن تكون مليارديرة، قائدة، ومؤثرة عالميًا
