الدولار هيجيلك لحد البيت.. الكول سنتر الدولي فرصة من دهب و600 جنيه في الساعة

تعرف تتكلم عربي؟ ليك شوية في اللهجة الخليجي؟ طيب بتتكلم بالشامي زي باب الحارة؟ .. ايه رأيك في شغل قبضه بالدولار؟ 600 جنيه في الساعة وقابلة للزيادة .. والشرط بسيط .. تتكلم عربي والمفاجأة بقى كمان هنقولك الخطوات والمواقع وتقدم إزاي.

الدولار هيجيلك لحد البيت ومش محتاج غير تتكلم عربي.. تخيل كده إنك قاعد في بيتك، فاتح اللابتوب أو حتى موبايلك، وبترد على مكالمة من عميل في أمريكا أو أوروبا، وكل اللي محتاجه منك إنك تتكلم عربي فصيح أو لهجة شامية أو خليجية.. وفي آخر اليوم تلاقي حسابك وصلك عليه 30 أو 40 دولار من غير ما تتحرك من مكانك

ده مش حلم ولا فيلم، دي الحقيقة اللي بقت واقع دلوقتي مع شغل "الكول سنتر الدولي" للناس اللي بتتكلم عربي، الوظايف دي بقت ترند عالمي، خاصة في بلاد زي مصر، بسبب فرق التوقيت بينا وبين أوروبا وأمريكا، وكمان فرق العملة.. وده خلى شركات كبيرة جدا برا بدأت تدور على ناس في مصر تشتغل معاهم أونلاين في خدمة العملاء والدعم الفني، خصوصًا للناس اللي بتتكلم عربي كويس.

ليه مصر بقت مغرية للشركات دي؟ ..

أولًا فرق التوقيت ياسيدي

يعني وإحنا بنصحى الصبح، الناس في أمريكا لسه نايمة، فـ الشركات هناك بتحب توظف ناس في حتت تانية عشان يغطوا الـ 24 ساعة

ثانيًا فرق العملة .. وكلمني على العملة يا معلم

1 دولار بحوالي 50 جنيه مصري، فلو الشركة بتديلك 12 دولار في الساعة، فأنت بتاخد في مصر حوالي 600 جنيه، وده مبلغ يعتبر محترم جدا مقارنة بأي شغل تاني في السوق

ثالثًا عدد العرب في أوروبا وأمريكا

احنا العرب ما شاء الله مقضينها هجرة وسفر وعيشة في أوروبا وأمريكا وعددنا بقى كبير، فالشركات هناك بقت محتاجة ناس بتتكلم عربي علشان يتواصلوا معاهم بسهولة.

طيب المرتبات عاملة إزاي؟

الشركات الكبيرة بتبدأ تديلك من 12 دولار في الساعة، وفي ناس بيقبضوا لحد 18 و24 دولار لو اشتغلوا في وقت إضافي (أوفر تايم) .. يعني لو اشتغلت 6 ساعات في اليوم، 5 أيام في الأسبوع، هتكسب في الشهر حوالي 30 ألف جنيه مصري، ويمكن أكتر.. سامع كام ؟؟ 30 ألف جنيه وأنت بتتكلم عربي بس!

وهنا نيجي للشركات اللي بتوظف عرب أونلاين..  ودي يا سيدي  شركات أجنبية بتفتح باب التقديم دايمًا للناس اللي بتتكلم عربي، زي: Starlink وState Farm وUnitedHealth Group وTikTok Support وPayCargo

كل الشركات دي بتدور على موظفين كول سنتر يشتغلوا من البيت، أهم حاجة تكون بتتكلم عربي بطلاقة، وعندك مهارات تواصل كويسة.

طبعًا أنت دلوقتي .. مفيش على لسانك غير سؤال واحد .. أقدم إزاي؟ ..

متقلقش الخطوات بسيطة والمجهود مش كبير .. بس محتاج منك حبة ذكاء وتسويق لنفسك، لأنك بتسجل على مواقع توظيف زي:

ZipRecruiter.com

Indeed.com

Jooble.org

FlexJobs.com

اكتب في السيرش: "Remote Arabic Customer Service" أو “Arabic Call Center” وهتلاقي الوظايف قدامك..

فجهز CV محترم بالإنجليزي، يوضح إنك بتتكلم عربي وإنجليزي، وعندك خبرة (حتى لو بسيطة) في خدمة العملاء أو التواصل مع الناس.. هيطلبوا منك تعمل Interview أونلاين، خلي عندك إنترنت كويس، وسماعة محترمة، ومكان هادي.

طيب إيه اللي يميزنا كمصريين في الشغل ده؟

إحنا شعب "بيعرف يتكلم"، وعندنا قدرة رهيبة على حل المشاكل والمراوغة بالذوق.. المصريين متعودين على التعامل مع ناس من ثقافات مختلفة، وده بيخلينا نعرف نفهم العميل ونريّحه حتى لو متنرفز

كمان في شركات عالمية بدأت تفتح مراكز خدمة عملاء في مصر، زي ما حصل في القرية الذكية والمعادي تكنولوجي بارك، لأن عندنا كوادر جامدة وسعرهم منافس جدًا

أقولك على حاجة .. أرقام تحمّسك أكتر..

من بداية 2024، الطلب على الموظفين العرب في خدمة العملاء زاد بنسبة 30%

المتوقع إن السوق ده يكبر بنسبة 20% سنويًا لحد سنة 2030

مصر حاليًا بتضم أكتر من 100 مركز كول سنتر بيشتغلوا مع شركات أجنبية.

فأنت  لو بتتكلم عربي كويس، وعندك شوية مهارات تواصل، والدنيا ماشية معاك في التكنولوجيا… ما تضيعش الفرصة.. دي مش شغلانة مؤقتة، دي فرصة ممكن تغير حياتك، وتخليك تكسب بالدولار وإنت قاعد في بيتك

قوم بقى حضر نفسك، واظبط الـ CV واتمتع بالدولارات يا معلم