من غير تعب ولا مشاوير.. إزاي تأسس شركتك أونلاين من البيت؟
في الزمن اللي كل حاجة فيه بقت ديجيتال، فكرة أنك تروح مشاوير وتوقف في طوابير وتدور على أوراق وتدخل مكاتب، بقت دقة قديمة ، دلوقتي، تقدر تأسس شركتك أونلاين وأنت قاعد على الكنبة في بيتك، من غير ما تتحرك خطوة
الدولة المصرية عاملة مجهود كبير في تيسير الاستثمار، وده من خلال قانون الاستثمار الجديد اللي بيقدم تسهيلات كتير للمستثمرين، سواء مصريين أو أجانب، وبيوفر لهم ضمانات ضد أي قرارات مفاجئة أو تعسفية.
ومن أهم الخدمات اللي بقت متاحة دلوقتي هي خدمة أسس بنفسك من خلال موقع الهيئة العامة لـ الاستثمار، واللي بتمكن أي حد إنه يؤسس شركته من البيت، من غير ما يضطر يروح مركز خدمات المستثمرين.
طيب نبدأ منين؟
أول خطوة هي أنك تدخل على موقع الهيئة العامة للاستثمار، تسجل نفسك، وتفتح حساب، ويبقى عندك مساحة عمل خاصة بيك، زي لوحة تحكم كده تتابع من خلالها كل حاجة
بعد كده، بتختار نوع الشركة اللي عايز تعملها، هل منشأة فردية ولا شركة أشخاص ولا شركة أموال ودي بيسموها شركات مساهمة أو ذات مسؤولية محدودة
وكل نوع ليه مستنداته، بس الميزة إنك ترفع كل المستندات دي أونلاين، وتستلم كل حاجة على نفس الحساب بتاعك على الموقع.
طيب لو هتفتح منشأة فردية.. محتاج إيه؟
بص يا سيدي .. مش محتاج غير صورة بطاقة أو جواز سفر ساري، وتوكيل لو حد غيرك هيقدم عنك واستعلام أمني لو أنت أجنبي لو عندك حصة عينية زي أجهزة أو معدات محتاج تقرير تقييم من خبير، آخر حاجة لو هتفتح في منطقة حرة، بتحتاج موافقة مسبقة من الهيئة.
وبمجرد ما ترفع المستندات الهيئة بتراجعها وتدفع الرسوم بكارت الائتمان، توقع إلكتروني، وتستلم مستنداتك على الموقع
ولو شركة أشخاص محتاج ايه؟
هتكون محتاج .. صور إثبات شخصية لكل الشركاء وتوكيلات من كل الشركاء، والتوكيل لازم يكون فيه بند تأسيس شركة وصورة كارنيه المحامي اللي هيعتمد العقد واستعلام أمني لو في شركاء أجانب وموافقة أي جهة مختصة لو النشاط بيتطلب موافقة خاصة، وآخر حاجة تقييم أي حصص عينية
ولو الشركة طالعة نتيجة وفاة صاحب منشأة فردية، هتحتاج إعلام وراثة، وشهادة وفاة، ومحضر اجتماع الورثة.
فكدا يا سيدي : الخطوات زي ما هي ثابتة .. تسجيل .. رفع أوراق.. دفع إلكتروني.. توقيع.. استلام المستندات على البوابة
طيب لو عايز تفتح شركة أموال؟
ودي زي الشركات المساهمة أو ذات المسؤولية المحدودة، وبتبقى محتاج:
شهادة بعدم التباس الاسم التجاري وشهادة بنكية بإيداع جزء من رأس المال وتوكيلات من كل المؤسسين وصور إثبات شخصية ليهم ومحامي معتمد من النقابة وبيانات مراقب حسابات
بس خد بالك لو في حصة عينية هتجيب تقرير تقييم من لجنة أو خبير، ولو في منطقة حرة هتجيب موافقة مجلس إدارة المنطقة الحرة أو مجلس الوزراء حسب النوع.
وبرضه الخطوات ما بتتغيرش .. الموقع هو الأساس، وكل حاجة بتخلص من عليه
يعني ببساطة.. مش لازم تروح أي مكان. كل حاجة بتتعمل من موبايلك أو لابتوبك، الحكومة وفرتلك كل الأدوات والخدمة سهلة وسريعة وآمنة.. فلو عندك فكرة مشروع وعايز تبدأ، مفيش أسهل من كده.. إبدأ تأسيس شركتك النهاردة من غير لا ورق ولا مشاوير.. قولنا بقى ناوي تفتح شركة ايه؟