البطالة تحت الـ6% لأول مرة من 35 سنة.. اقتصاد مصر بيتنفس بشبابها
البطالة في مصر بتتاكل حلم الـ5٪ مش بعيد.. دا واقع .. شباب مصر بيقلبوا اللعبة .. 6.6% بطالة؟ ده أقل رقم في 35 سنة.
القطاع الخاص هو مفتاح المستقبل .. فرص شغل أكتر، مصر قدامها فرصة كبيرة .. الاقتصاد في تحسن مستمر... بيخلق فرص
لو كل اللي فات حمادة، فاللي جاي حمادة تاني خالص .. مصر ماشية بخطوات ثابتة وسريعة ناحية مستقبل اقتصادي أقوى وأكبر.. سوق العمل بيتغير حوالينا واحنا مش حاسين، والفرص بتتفتح في وش اللي بيدور ويسعى.
تعالوا نرجع ورا شوية، زمان كان الشاب علشان يلاقي شغل، لازم يعدي بألف باب ومقابلة، وكان بيضطر يقبل أي حاجة، بس دلوقتي، الوضع اتبدل.
مشروعات قومية ضخمة اتحركت، ودلوقتي بنشوف مدن جديدة بتتبني على أحدث طراز، صناعات بتطلع من قلب الصحرا، شبكات طرق بقت بتوصل أي مكان ببعضه بسهولة.
بس السؤال: هل دي النهاية؟ .. لأ، بالعكس، دي كانت بداية بس، تمهيد للخطوة اللي أهم.. خطوة تمكين القطاع الخاص
الهدف؟ .. مستقبل اقتصادي قوي ومستدام.. مش بس نخلق شغل دلوقتي ونرتاح، لأ، نخلق شغل يدوم لأولادنا كمان
والدليل على كلامي.. النهاردة وإحنا في 2024، البطالة وصلت 6.6٪، وده أقل رقم حققناه من 35 سنة، رغم إن عدد السكان تخطى 106 مليون مواطن
متخيلين الرقم؟ .. في وقت العالم كله بيتكلم عن أزمات وبطالة وفقر اقتصادي، إحنا بننزل البطالة ومستمرين .. والأجمل إن الشباب هم اللي بيكسروا الأرقام دي، شباب سنهم من 15 لـ29 سنة، اللي كان بيتقال عليهم "أزمة بطالة"، بقوا هما اللي بيملوا سوق الشغل
طب نرجع شوية بالأرقام:
سنة 2011 البطالة كانت 12٪
سنة 2015 ارتفعت لـ12.8٪
النهارده؟ 6.6٪ بس
وده مش كلام إنشائي دي بيانات رسمية من الجهاز المركزي للتعبئة العامة والإحصاء، اللي رصد كمان تطور خطير وجميل:
قوة العمل في مصر وصلت لأكتر من 32 مليون شخص
منهم 26 مليون رجال، وحوالي 6 مليون سيدات
والأجمل كمان؟ مشاركة السيدات في سوق العمل في الريف بدأت ترتفع بشكل كبير، وده معناه مجتمع أكتر توازن
مش بس كده، معدلات البطالة انخفضت في كل مكان:
بطالة المدن نزلت من 9.9٪ لـ9.6٪.
وبطالة الريف من 4.8٪ لـ4.2٪.
يعني النهاردة، سواء إنت ساكن مدينة أو ريف، فرصك في الشغل أحسن بكتير من أي وقت فات... طيب إزاي وصلنا لده كله؟ .. بالتخطيط طبعا .. ومش صدفة
الدولة اشتغلت على رؤية طويلة المدى:
استراتيجية التنمية المستدامة مصر 2030
دعم الاستثمار المحلي والأجنبي
إصلاحات اقتصادية كبيرة
تحسين بيئة الأعمال
والرهان الكبير دلوقتي على القطاع الخاص، تعرفوا إن 70٪ من الوظائف اللي بتتخلق دلوقتي مصدرها القطاع الخاص؟
يعني مفيش اقتصاد ناجح من غير قطاع خاص نشيط، وده اللي مصر اشتغلت عليه بقوة خلال السنين اللي فاتت
وفيه تسهيلات جديدة بقت موجودة:
منح أراضي صناعية بحق الانتفاع
تسهيلات ائتمانية للمستثمرين
خفض زمن تأسيس الشركات
توفير مناطق صناعية جاهزة للاستثمار
كله متكامل عشان سوق العمل يفضل يولد وظائف جديدة، ويقلل البطالة أكتر وأكتر
إحنا مش بس بنقلل أرقام البطالة، إحنا بنبني أساس اقتصادي متين.. الطريق مش سهل، بس واضح والمستقبل، بكل المؤشرات، أحلى
وسؤال على السريع قبل ما نخلص .. لو كملنا بنفس المعدل ده، تتوقعوا مصر هتبقى فين كمان 5 سنين؟