زيارته لمصر هتفتح الباب لكنوز بالمليارات.. 10 ملفات على طاولة مناقشات السيسي والرئيس الصيني
- زيارة تاريخية للرئيس الصيني واستثمارات ممكن تعدي رأس الحكمة
- السيسي وشي جين بينج قمة .. هتغير شكل الشرق الأوسط
- قمة جاية بعد مناورة عسكرية مشتركة اتكلم عنها العالم وهي نشور الحضارة
- من العاصمة الإدارية لقناة السويس.. الصين بتراهن على مصر
- 9 مليار دولار.. استثمارات صينية مباشرة والقاهرة جاهزة لقفزة جديدة
- أكتر من 2000 شركة صينية .. وآلاف الوظائف ودفعة اقتصادية رهيبة
- في ايه يا ترى هيكون على طاولة السيسي وبينج؟ .. لأن مصر عينها على أكبر من الاستثمارات الصينية في إفريقيا 52 مليار دولار
الملف الأول.. الاستثمارات الصينية في مصر
ودي وصلت لأرقام كبيرة، ففي العام المالي 2023، سجلت حوالي مليار دولار، ومع زيادة كبيرة تعكس ثقة المستثمرين الصينيين في السوق المصري.. وبنهاية 2024، إجمالي الاستثمارات الصينية المباشرة وصل لـ9 مليار دولار، من خلال أكتر من 2000 شركة صينية بتغطي قطاعات زي الطاقة، الصناعة، والتكنولوجيا فالزيارة متوقع تفتح الباب لاستثمارات جديدة في مجالات زي السيارات الكهربائية والصناعات الكيماوية.
الملف التاني .. منطقة "تيدا" الاستثمارية
ودي في المنطقة الاقتصادية لقناة السويس وبقت ركيزة أساسية للاستثمارات الصينية. المنطقة دي فيها أكتر من 150 شركة باستثمارات تجاوزت 2.5 مليار دولار، وفرت آلاف فرص العمل للمصريين.. وفي السنتين الأخيرة، المنطقة الاقتصادية لقناة السويس جذبت 128 مشروع بقيمة 6 مليار دولار، 40% منهم استثمارات صينية.
الملف التالت.. حجم التبادل التجاري
حجم التبادل التجاري بين مصر والصين وصل 17 مليار دولار في 2024، وده رقم قياسي يعكس إن الصين الشريك التجاري الأول لمصر للعام العاشر على التوالي.. فيه خطط دلوقتي لزيادة الصادرات المصرية زي البرتقال والعنب للسوق الصيني، وكمان مناقشة تسوية المعاملات بالعملات المحلية زي الجنيه واليوان علشان نقلل الضغط على الدولار
الملف الرابع .. العاصمة الإدارية الجديدة
وهنا الصين لعبت دور كبير في العاصمة الإدارية الجديدة، خاصة في حي المال والأعمال، اللي بيعتبر أكبر مركز تجاري في أفريقيا.. وشركات صينية زي "CSCEC" نفذت مشروعات ضخمة زي الأبراج والمباني الحكومية.
الملف الخامس .. القطار الكهربائي السريع
وهنا الصين بتدعم مصر في مشاريع النقل الحديثة، زي القطار الكهربائي الخفيف اللي بيربط العاشر من رمضان بالعاصمة الإدارية الجديدة، بتكلفة حوالي 1.2 مليار دولار، وبتمويل من بنك "إكسيم" الصيني.
الملف السادس .. مشروعات الطاقة الجديدة والمتجددة
مصر بتركز على الطاقة الشمسية وطاقة الرياح كجزء من رؤية 2030، والصين رائدة عالميًا في المجال ده.. شركات صينية زي "TBEA" بنت 3 محطات طاقة شمسية في مجمع بنبان بأسوان بقدرة 186 ميجاوات.. كمان فيه تعاون في مشروعات زي محطة توليد الكهرباء بالفحم النظيف في الحمراوين. الزيارة ممكن تشهد شراكات جديدة لتطوير الطاقة الخضراء.
الملف السابع .. الاستثمارات الزراعية والغذائية
مع أزمة الأمن الغذائي العالمية، مصر بتسعى تستفيد من خبرة الصين في الزراعة الذكية والتكنولوجيا اللي بتزود الإنتاج وتقلل الفاقد. فيه مشروعات زراعية متوقعة زي إنشاء مزارع حديثة باستثمارات صينية، زي مشروع زراعة مليون فدان اللي بقيمة 7 مليار دولار.
الملف التامن .. التكنولوجيا والابتكار
الصين متقدمة في الذكاء الاصطناعي والرقمنة، ومصر عايزة تستفيد من التجربة دي لدعم رؤية 2030.. زي الاهتمام بإنشاء مراكز تكنولوجية في مصر بالتعاون مع شركات صينية زي "هواوي" لتدريب الشباب ونقل الخبرات.
الملف التاسع .. قطاع السياحة والثقافة
فيه خطط لتشجيع السياحة الصينية لمصر، زي أن السائح الصيني بيحصل على التأشيرة بمجرد وصوله مصر .. ومتوقع اتفاقيات لجذب استثمارات صينية في بناء وإدارة الفنادق.
الملف العاشر .. التعاون في مجالات الفضاء والتعاون العسكري
مصر والصين نجحوا قبل كده في إطلاق قمر "مصر سات-2" للاستشعار عن بُعد.. خاصة أن الزيارة بعد مناورات "نسور الحضارة 2025" الجوية المشتركة، مما يعكس تعزيز التعاون العسكري بين جيش التحرير الشعبي الصيني والقوات المسلحة المصرية
فالزيارة دي مهمة جدًا .. لأن مصر بتمر بمرحلة اقتصادية حساسة، وبتحتاج شراكات قوية لدعم التنمية. الزيارة دي دفعة كبيرة للعلاقات المصرية الصينية، وممكن تجذب استثمارات بمليارات الدولارات، خصوصًا في ظل مبادرة "الحزام والطريق" اللي مصر جزء مهم منها. كمان، والصين كمان بتشوف مصر شريك استراتيجي موثوق، وبتسعى تستفيد من اتفاقيات التجارة الحرة اللي بتخلي مصر مركز للتصدير لأسواق بتضم 2 مليار مستهلك
أخيرًا .. يا ترى، إيه أكتر ملف هيشد انتباه الرئيس السيسي وشي جين بينج؟
