300 مليار دولار وملايين فرص العمل.. مصر جاهزة بـ خريطة استثمار هتنقلنا حتة تانية
مصر داخلة على انفتاح اقتصادي غير مسبوق وهناك خطة عمل عظيمة هتنقلنا في حتة تانية خالص وهنفتح فرص شغل بالملايين في كل القطاعات .. 300 مليار دولار .. رقم ضخم بيأكد جدية الخطة.
والسؤال هنا إزاي مصر تنتقل بالخطة دي لمصاف الدول الكبرى اقتصاديًا؟ وإزاي نوصل لاستثمارات بـ300 مليار دولار في 10 سنين بس؟.. والاستثمارات دي هتخلق فرص شغل قد ايه؟ وهتكون في القاهرة بس ولا كمان في المحافظات؟
دي أسئلة هنجاوبك عليها ونكشف سوا تفاصيل خريطة الاستثمار الجديدة اللي هتفتح أبواب الرزق والفرص في كل شبر من أرض مصر
الخريطة دي مش مجرد أرقام، لأ.. دي رؤية واضحة بتستهدف نقل اقتصادنا في مستوى جديد تمامًا .. بنشتغل على خطة طموحة تمتد لعشر سنين، شغالة على كل القطاعات: الصناعة، السياحة، الصحة، الطاقة الجديدة، التحلية، تكنولوجيا المعلومات، وحتى الخدمات.
عارفين يعني إيه 300 مليار دولار؟.. ده رقم مهول.. رقم هيضخ استثمارات ضخمة جدًا في كل محافظة وكل قطاع.. يعني هيخلق شغل لملايين الشباب وهيفتح مجالات جديدة للقطاع الخاص وهيقوي الاقتصاد الوطني.
الخطة الجديدة دي بتقوم على إننا نهيأ بيئة استثمارية استثنائية.. يعني إيه؟ يعني نكون جاهزين نرحب بالمستثمرين من كل حتة في العالم. نوفر لهم قوانين واضحة، إجراءات سهلة وسريعة، ونضمن ليهم استقرار تشريعي وسياسات مالية ونقدية مستقرة.
كمان الدولة هتقوم بدور المنظم اللي بيضمن المنافسة العادلة.. مش بس كده، لأ.. الدولة هتسيب القطاع الخاص ياخد الدور القيادي في الإنتاج والتصنيع والخدمات.. دور الدولة هنا هو التأكد إن كل حاجة ماشية صح، بدون عوائق ولا فساد.
في القطاع الصناعي، الخطة بتستهدف جذب 10 شركات عالمية عملاقة خلال سنتين بس.. شركات هتضخ استثمارات تتراوح بين 1 إلى 3 مليارات دولار لكل واحدة. الهدف هنا مش بس مصانع جديدة، لأ.. كمان توطين صناعات حديثة وتقوية سلاسل الإمداد المحلية، والرقم الكلي للصناعة بيتراوح بين 50 إلى 100 مليار دولار
بالنسبة للطاقة الجديدة والمتجددة.. هنا بقى التركيز على مشاريع بقدرة 30 ميجاوات، مع التزام المطورين بتمويل الشبكة الكهربائية بالكامل. ومش بس كده، هنركز كمان على الهيدروجين الأخضر وتوطين الصناعات المغذية ليه. الرقم المستهدف هنا؟ 100 مليار دولار
السياحة كمان واخدة نصيب الأسد. الدولة هتضاعف عدد الغرف الفندقية بإضافة 120 ألف غرفة جديدة، بمستويات بين 3 لـ 5 نجوم، في مختلف المحافظات. ده هيعمل نقلة حقيقية في جذب السياح وزيادة دخلنا القومي.
وفي الصحة.. الخطة بتستهدف إضافة 140 ألف سرير جديد ضمن منظومة التأمين الصحي. وكمان شراكة مع القطاع الخاص لتغطية كل الخدمات الطبية، بهدف جذب استثمارات بين 30 إلى 40 مليار دولار!
أما تكنولوجيا المعلومات.. هنا فيه طموح كبير جدًا لجذب استثمارات في مراكز البيانات، والصناعات الإلكترونية، وأشباه الموصلات، وكمان البرمجيات. وده مش بس هيطور السوق، ده كمان هيخلق آلاف الوظائف العالية الأجر.
مش ناسيين كمان قطاع تحلية المياه.. الدولة بتستهدف جذب استثمارات بين 10 لـ30 مليار دولار لمشاريع تحلية مياه البحر وتوطين صناعتها بالكامل.
طب إيه اللي هيخلي الخطة دي تنجح؟ .. 4 أسباب واضحة
الأول هو الإرادة السياسية اللي شايفة بوضوح إن مصر محتاجة الانفتاح الكبير ده.
التاني الرؤية الاقتصادية اللي مش بس شايفة بكرة… شايفة كمان إزاي نحققه.
التالت تضافر كل الوزارات مع بعض لإعداد ملفات استثمارية جاهزة: فيها كل الموافقات والتراخيص، ودي نقطة مهمة جدًا.
الرابع .. الحملات الترويجية الشاملة اللي هتبدأ بعد 3 شهور بس من دلوقتي. يعني مش هنستنى كتير
الخطة دي هتخلق ملايين من فرص العمل في كل المجالات، من العمالة البسيطة لحد المهندسين والأطباء والتقنيين. هتفتح باب رزق جديد للشباب وهيخلي مصر فعلاً في حتة تانية.
ومش بس ده… الخطة دي هتخلي مصر وجهة عالمية للاستثمار.. المستثمرين هييجوا يشتغلوا في بلد عندها كل حاجة جاهزة.. بنية تحتية، قانون استثمار حديث، سوق ضخم بـ100 مليون مستهلك، وموقع استراتيجي عالمي.
يعني من الآخر .. إحنا قدام خطة وطنية ضخمة، مش مجرد كلام.. 300 مليار دولار رقم مش سهل، لكنه قابل للتحقيق بخطة مدروسة وإرادة سياسية قوية. وإحنا كمصريين، قدامنا فرصة نعيش نقلة اقتصادية تاريخية ونشارك في بناء مستقبل بلدنا
