من خطر زوال الدلتا في 2100.. «جريان» مشروع القرن في مصر بحلم الدلتا الجديدة
الدلتا القديمة بتواجه خطر الإزالة في 2100.. بس مصر بتبني دلتا جديدة ومن من قلب الصحراء الغربية.. اكتر من 2 مليون فدان أخضر بيطلع للنور في مشروع جريان ومش بس مشروع زراعة.. ده مجتمعات كاملة جديدة.
مشروع بحجم 5 محافظات.. هيحول الصحرا لأرض خضراء .. والسؤال هنا.. إيه هي المحاصيل الجديدة اللي هتزرعها مصر في مشروع جريان؟ و ليه المشروع ده يعتبر مشروع القرن لمصر؟
تفاصيل كتير هنحكيها ليكم وأسئلة مهمة هنجاوب عليها في الفيديو…
في جرس إنذار بيدق من سنين.. دلتا النيل القديمة والإسكندرية في خطر حقيقي والدراسات بتقول إنه لو منسوب البحر زاد متر واحد بس، 5.5 مليون مصري هيلاقوا نفسهم بيواجهوا الغرق، وده في 21 مدينة وتجمع سكني في كفر الشيخ، دمياط والدقهلية
الأبحاث والتقارير بتأكد إن دلتا النيل بتنخفض من 3 لـ 5 ملم في السنة.. يعني كل سنة الأرض بتغرق شوية والأسوأ؟ لو البحر زاد نص متر بس، 67% من سكان الإسكندرية هيبقوا في خطر مباشر، و30% من مساحتها هتختفي.. هو دا لسه بعيد في 2100 بس مصر عاملة حسابها .
والدولة قررت ترد بخطة جديدة وجبارة وهو مشروع جريان .. حلم الدلتا الجديد اللي بيتعمل على مساحة 2.2 مليون فدان في الصحراء الغربية.. تخيلوا ده تقريبا مساحة 4 لـ 5 محافظات كاملة.. والمشروع ده مش بس زراعة وخلاص، ده كمان هيضيف حوالي 23% من الأراضي الزراعية الموجودة في مصر، وهيخلق حوالي 250 ألف فرصة عمل.
المياه جاية منين؟
مصر عاملة 3 محاور أساسية لنقل المية:
ممر مائي شمالي طوله 170 كم، بينقل 7.5 مليون متر مكعب يوميًا من ترعة الحمام الجديدة
ممر مائي شرقي طوله 41.3 كم، بينقل 10 ملايين متر مكعب يوميًا من ترعة تحيا مصر
والأهم .. محطة معالجة مياه الصرف الزراعي في الدلتا الجديدة، أكبر محطة في العالم، بتعالج 7.5 مليون متر مكعب يوميًا، ومعتمدة بـ 4 أرقام قياسية في موسوعة جينيس
هدف المشروع مش بس زراعة… لا ده كمان خلق مجتمع جديد.. بهدف تقلل التكدس في الدلتا القديمة، وتوفير فرص سكن وفرص شغل كويسة، وتحقيق الأمن الغذائي.. لأن مشروع جريان مش بس حقل أخضر، ده مدن جديدة بالكامل هتتولد في قلب الصحراء
ومش بس كده.. رئيس الوزراء مصطفى مدبولي قال بصراحة: مشروع الدلتا الجديدة مش مجرد شوية أراضي، ده حلم بيتحقق.. احنا بنتكلم عن مشروع بحجم 4 لـ 5 محافظات كاملة، متوقع إنه يوصل مساحته لـ 2.8 مليون فدان كمان شوية.
والمشروع ده متوقع يخلق فرص عمل مباشرة وغير مباشرة لحوالي 250 ألف شاب وراجل وست.. وهيوفر سكن وفرص حياة لأكتر من 2.5 لـ 3 مليون أسرة.
وكمان هيضم منطقة صناعية ولوجستية ضخمة عشان الاقتصاد يتحرك.
هنزرع إيه؟
المشروع بيركز على زراعة القمح، الذرة، البقوليات، الخضار والفواكه، وده كله عشان نحقق الأمن الغذائي ونقلل الاستيراد.
كل نقطة مية محسوبة.. مصر أصلاً عندها شح في المية، عشان كده المشروع مركز على مد شبكات طرق متطورة ومحطات تحلية مياه ومحطات طاقة نظيفة وكهربة مستدامة واستغلال مياه الصرف الزراعي وتحويلها لمياه صالحة للري بدل ما كانت بتترمي في البحر المتوسط.
كمان تم اكتشاف خزان جوفي ضخم في الصحراء الغربية، قادر يروي ملايين الأفدنة.. وده إضافة هائلة بتخلي المشروع يحقق الاكتفاء الذاتي من المية.
الدكتور محمد القرش، المتحدث باسم وزارة الزراعة، قالها بصراحة: المشروع ده جزء من رؤية مصر للخروج من الوادي الضيق، وربط الصحراء بحياة جديدة، وده من خلال تطوير طريق روض الفرج – الضبعة اللي بيربط 4 محافظات: مطروح، البحيرة، الجيزة، والفيوم.
من الآخر .. مشروع جريان أو الدلتا الجديدة مش مجرد شوية أرقام .. ده مشروع حياة بيواجه خطر غرق الدلتا القديمة، وبيفتح لنا أبواب التنمية والفرص.. فمشروع جريان والدلتا الجديدة هما المفتاح لبكرة أحسن… مشروع القرن اللي هيغير شكل مصر
