الكيلو بـ2500 جنيه.. "الدود" أغرب تجارة هتشوفها في مصر!
تجارة غريبة انتشرت في مصر بقاله فترة، انت متخيل إن في ناس بتتاجر في الدود؟ أيوه الدود اللي ممكن تشمئز منه ناس كتير بتاجر فيه وبيبعوه كمان بمبالغ ضخمه.
الموضوع مش هزار لدرجة ان في أماكن مخصوصة لبيع الدود، زي مثلا سوق الجمعة في السيدة عايشة، وهناك هتلاقي تجار واقفين قدامهم كميات كبيرة من الديدان، وكل نوع وله سعر
طب انت عمرك كنت تصدق أن الكيلو من الديدان ممكن يوصل لـ 2000 جنيه يس لو الدودة صغيرة، أما الكيلو من الدود الكبير بيبدأ من حوالي 300 جنيه.
بس ياترى الناس بتشتري الدود ده ليه؟
اقولك، الدود ليه استخدامات كتير واهمها أنه اكل للطيور وطعم للأسماك، لأنه أكل صحي ومغذي ليهم.
يعني لو الموضوع طلع في دماغك خد الخطوة ومتقلقش لإنك ممكن تبدأ المشروع ده بـ 300 جنيه بس، وتربي الديدان في البيت، يعني مش هتحتاج تاجر مكان ليهم ولا تدفع كهرباء ولا نور.
كمان الميزة في المشروع ده أن الدورة مش بتاخد اكتر من 3 شهور، يعني مكسبك هتاخده في اسرع وقت تتخيله
وعلى فكرة التجارة دي كمان وصلت للعالمية، وفي تجار بيصدروا مئات الألوف من الديدان لدول برا، وسعر الكيلو برا ممكن يوصل لـ 2500 جنيه.
وخليني اقولك إن فيه تاجر هو بنفسه اللي أكد الكلام ده و آخر صفقة عملها صدر فيها دود كانت بـ 750 ألف جنيه لان فيه جامعات ومراكز بحث في أوروبا وأمريكا بيشتروا الديدان دي عشان التجارب العلمية، وحتى دول عربية كمان بتطلبها بشكل رسمي.
وخليك عارف ان من أغلى أنواع الدود اللي ممكن تشتغل فيه هو دود الريد وجلر، سعر الـ100 جرام منه ممكن يوصل لـ 300 جنيه، لانه فيه سماد بيطلع منه اسمه فيرمي كومبوست، وده سماد عضوي بيغذي التربة، ويصلحها بعد ما تكون اتبهدلت من الكيماويات.
واحد من أصحاب مزارع الدود قال ان الدود فيه من أنواع كتير وفيه اللي الكيلو منه ب400 حنيه وفيه اللي ب2000 بس اكتر انواع الدود اللي بتكسب هو دود ميل ورم، وسوبر وورم لان حجم الربح بيوصل ل 10 أضعاف تقريبا، يعني لو دفعت فيه 10 جنيه هتكسب
يعني لو بتدور على مشروع صغير، بتكلفة بسيطة، ممكن تكون تربية الدود هي فكرتك الجاية.