ناوي تسافر.. 6 حاجات لازم تخلي بالك منها عشان متعرضش نفسك للخطر
خلاص بتجهز شنطتك ونازل تسافر السخنة أو الساحل يبقى لازم تخلي بالك كويس اوي من الكلام اللي هقوله دلوقتي عشان متعرضش نفسك ولا اسرتك للخطر
مبدائيا كده اول حاجة لازم تعملها انك متسافرش بليل وده لاكتر من سبب أولهم أن الرؤية ممكن تكون ضعيفة، كمان انت ممكن تنام على الدركسيون، أو سواق غيرك ماشي بعربية وراك ينام وييجي يخبطك
يعني مفيش حاجة اسمها "الطراوة ونلحق اليوم من أوله"، حضرتك ممكن متلحقش اليوم أصلا، اصحى بدري وسافر الصبح وانت صاحي ومصحصح
وبلاش بقى عربيتك تكون مليانة ناس وده عشان هياثر على فرامل عربيتك، طب ازاي؟
اقولك يعني وانت لوحدك العربية بتقف بسرعة، لكن وإنت شايل 5 أشخاص، الفرامل محتاجة وقت أطول، وجرب ده بنفسك وانت هتشوف الفرق
وياريت سرعتك متزدش عن 100 أو 120 بأي حال، خصوصا على طريق سفر، لان لو ظهر قدامك حد مثلا وانت مركب ٥ أشخاص في العربية فهيحصل حاجتين العربية هتتقلب أو ممكن متلحقش وتخبط فبلاش سرعة، سواء بقى عربيتك جديدة أو قديمة مش هتفرق كتير لازم تاخد بالك
وخليك عارف ان الكاوتش مش لعبة يعني مترحش تنفخه عن اي حد بجنيه وتفتكر أن الكاوتش تمام كده الافضل انك تروح أي بنزينة كويسة، فرغ الكاوتش كله واملاه نيتروجين، بـ5 جنيه للعجلة
وده لأن النيتروجين مش بيتمدد بالحرارة، وبيحميك من الانفجار والتقلب، لاقدر الله عكس الهواء العادي اللي بتنفخ بيه الكاوتش وده ممكن يسخن ويمتدد مع الاسفلت وينفجر
والأهم من ده كله بقى حزام الأمان لازم الكل يلبسه سواء الناس اللي راكبه قدام أو ورا، لازم الكل يربط الحزام، خصوصا ان في الحوادث، اللي مش رابط حزامه بيطير ويتقلب في العربية زي الغسيل في الغسالة، وخليك عارف ان حزام الأمان بيقلل الإصابات وحالات الوفاه
ومن الاخر كده عربيتك متهالكة ومتصلحش للسفر متسافرش بيها، يعني تروح تكشف عليها لو لقيت تيل الفرامل بايظ، أو العربية مش جاهزة للسفر، اقعد في بيتك ومتقولش "ربنا يستر" وانت معندكش إمكانيات السفر اصلا
وطبعا لازم عينك تكون على الطريق على طول يعني مراتك، أمك، عيالك قاعدين جنبك بيتكلموا ودنك معاهم، لكن عينك تفضل على الطريق، مفيش لحظة سهو، الحادثة بتيجي في ثانية
اخر حاجة بقى بلاش طرق مختصرة مش مضمونة
الطرق الجديدة اللي لسه بتتسلم؟ متخاطرش بيها، مفيش خدمات، مفيش شبكة، ولو حصل حاجة محدش هيوصلك.
واخيرا خد بالك من نفسك ومن اللي معاك وسفروا بأمان.