رجل المهام الصعبة.. كامل الوزير مهندس التنمية الصناعية في مصر
احنا هنصع الدولار وبنفتتح مصنع كل ساعتين، وإقالة مسئول كبير في هيئة التنمية الصناعية على الهوا.. تلات مشاهد وتصريحات كشفوا كل حاجة وحطوا النقاط على الحروف والأرقام مبتكدبش.. قدامنا الفريق مهندس كامل الوزير، راجل المهام الصعبة اللي بيدير ملف الصناعة بكل جرأة وحماس
من كام شهر، أول ما اتعين نايب رئيس الوزراء، كامل الوزير قال كلمتين مفيهمش هزار: “احنا هنصنع الدولار” و”كل مصنع ساعتين".. الكلام واضح، لا لف ولا دوران.. راجل فاهم هو رايح فين وجاي منين.. استلم القطاع الصناعي وهو لسه ماشي على عكاز، متمثل في 5% بس من الناتج المحلي.. لكن الراجل ده ناوي يوصله لـ20% بحلول 203.
كامل اوزير دخل القطاع الصناعي وهو شايف الصورة كاملة.. مش بس تطوير مصانع، ده بيبني مصانع وبيصنع الدولار حرفيا .. الاستراتيجية الصناعية 2024-2030 هدفها توصل مساهمة الصناعة في الناتج المحلي من 5% دلوقتي لحد 20% بحلول 2030 والرقم مش هزار.. يعني بدل ما الإنتاج الصناعي واقف عند 76 مليار دولار، هيقفز لـ170 مليار دولار سنويا .. وده شغل ناس عايزة تبني بلد بجد
مش بس كده، كمان دا القطاع الصناعي قادر يخلق فرص شغل من 7 لـ8 مليون فرصة، بدل 3.5 مليون بس دلوقتي.. وعلشان التصدير يبقى شريان الحياة، الوزير شغال يوصل الصادرات الصناعية لـ118 مليار دولار من أصل 145 مليار دولار مستهدفينهم بحلول 2030.
طيب ايه حكاية كل ساعتين.. مصنع جديد.. مصر عندها حوالي 151 فرصة استثمارية جاهزة في كل حاجة الحديد، الإطارات، المستلزمات الطبية، الغزل والنسيج.. يعني اللي عايز يشتغل يلاقي قدامه كل حاجة جاهزة ..
كامل الوزير عنده هدف واضح .. اكتفاء ذاتي بنسبة 100% في الصناعات الغذائية والملابس الجاهزة والجلود والأخشاب.. كمان تصنيع 80% من سيارات النقل الخفيف هنا في مصر، و52% من سيارات الملاكي (باستثناء الموتور). حتى طلمبات الرفع بقت تتصنع محلي بدل ما كنا بنستوردها بالكامل
الوزير شغال على إنشاء وتطوير 149 منطقة صناعية ومجمعات جديدة، زي مرغم 3 للصناعات البلاستيكية ودا بقدرة 144 وحدة إنتاجية ومدينة الجلود بالروبيكي 100 مصانع غراء جاهزة شغال).. كمان الدولة بتطور 31 ميناء جاف ومنطقة لوجستية جديدة، علشان المواد الخام والمنتجات تمشي بسرعة في السوق المحلي والدولي. غير كده: تطوير 7000 كم طرق، و10 آلاف كم سكة حديد، وقطار سريع 2000 كم!
الحكومة خصصت 190 مليار جنيه لدعم المصدرين لحد يونيو 2024، ولسه كمان 23 مليار إضافية من يوليو 2024. الصادرات بقت شريان مهم، والمصدرين خلاص بقوا عارفين إن مستحقاتهم بتتصرف خلال 90 يوم بس!
التحديات كانت كبيرة.. كان لازم يوقف نزيف العملة الصعبة، فقررت توطين الصناعات وتقليل فاتورة الاستيراد. شغال كمان على تشغيل المصانع المتعثرة وسحب الأراضي من اللي مش جادين. حط نظام جديد عشان مفيش حاجة تعطل.. كل إجراءاتك على منصة مصر الصناعية www.madein.eg. شغال كمان على تدريب العمالة الجديدة ورفع كفاءتهم. الأزمات العالمية زي كورونا وحرب روسيا وأوكرانيا اتعامل معاها بحكمة وهدوء عشان الصناعة متتأثرش. ورغم إن التصدير شغال، حافظ على الأسعار المحلية ثابتة في السوق.
كامل الوزير قرر إن الصناعة تشتغل 6 أيام في الأسبوع.. البلد كلها في حالة طوارئ تنموية! كل يوم سبت بيقعد ساعتين مع المستثمرين، يحل مشاكلهم على طول. قرار إقالة المسؤول اللي قصر في شغله على الهوا قدام الناس.. رسالة قوية إن الفساد مالوش مكان هنا! كمان بيشتغل على شراكات صناعية مع دول زي الإمارات وقطر والأردن.. التكامل الإقليمي مهم وهيوصل التبادل التجاري لـ182 مليار دولار قريب.
فالحقيقة .. كامل الوزير مش مجرد وزير.. ده راجل بيقود الصناعة عشان تبقى قاطرة الاقتصاد. بيبني مصانع.. بيشغل شباب.. وبيصنع الدولار.. ده راجل المهام الصعبة اللي رافع شعار صنع في مصر ومش بيهزر فيهه
