الكتان وصلهم للعالمية.. شبرا الملس.. قلعة صناعة الكتان في مصر

عارف إن في قرية صغيرة في مصر اسمها شبرا ملس بقت مشهورة في أوروبا والصين بسبب الكتان، أيوه متستغربش شبرا ملس بقت مصنع الكتان بتاع مصر والعالم

القرية دي لوحدها بتنتج حوالي 90% من إنتاج الكتان في مصر وكمان بتساهم بـ 8% من الإنتاج العالمي، يعني اسمها بقى معروف بره أكتر من جوا

 الفلاحين هناك بيزرعوا الكتان في أكتوبر لحد نص نوفمبر

وبيبدأوا يحصدوه من نص إبريل بس علشان الأرض الزراعية هناك قليلة، بيروحوا يأجروا أراضي في محافظات تانية علشان يفضل الإنتاج شغال طول السنة

 زراعة فدان الكتان بتكلف حوالي 90 ألف جنيه والفدان الواحد بينتج نص طن تقريبا وسعر الطن يوصل لـ 130 ألف جنيه حسب السوق العالمي

بس المفاجأة هو المكسب الحقيقي اللي  مش بس في الكتان نفسه، لا ده كمان في المخلفات بتاعته اللي بتدخل في صناعات تانية زي الحبال ومواد البناء

القرية فيها 50 مصنع بيشتغل فيهم اكتر من 120 ألف عامل، بينتجوا خيوط الكتان اللي بتصدر لأكبر الأسواق العالمية، وفي المصانع بيتم استخلاص خام الكتان، وبيتحول بعد كده لخيوط وبتتصدر لأوروبا والصين وأماكن كتير

وتحد من أهالي القرية قال إن الكتان  من المحاصيل الاقتصادية المهمة في الاقتصاد المصري، كفاية انه قدر  يوفر مئات فرص العمل، كل ده خلى  القرية مشهورة بزراعة وتصنيع الكتان، ويتزرع على مساحات كبيرة من المحصول

 وبسبب  العائد بتاعه كتير من المزارعين وأصحاب المصانع، اتوسعوا في زراعة الكتان بمساحات كبيرة سواء على مستوى المحافظة أو المحافظات المجاورة منها الدقهلية والشرقية والمنوفية وكفر الشيخ

لكن للأسف القرية بتواجه عواقب كتير و أكبر تحدي بيواجه أهالي شبرا ملس هو ارتفاع أسعار التقاوي والأسمدة ونقص الدعم الفني وصعوبة إنشاء المعاطن على الأراضي الزراعية

وكمان مشكلة الحرائق، لان الكتان سريع الاشتعال، وفي آخر حريق خسروا حوالي 70 مليون جنيه بسبب شونة اتحرقت على مساحة 3.5 فدان زي ما أكد على الدغيدي، رئيس جمعية منتجي الكتان بمصر

بس من سنتين، شبرا ملس دخلت ضمن مبادرة "حياة كريمة" واتحسن فيها كتير من البنية التحتية زي شبكات المية، والصرف الصحي، وطريق المصانع واتركبت حنفيات إطفاء جوه الشون علشان يقدروا يتعاملوا بسرعة مع أي حريق

 شبرا ملس مش بس قرية دي نموذج لنجاح حقيقي طالع من قلب الريف المصري