إيه اللي هيحصل يوم 9 يوليو؟.. توقعات أسعار الذهب في 2025
أسعار الدهب بقالها كام يوم كده وهي في الطالع، وواضح كده أن مع النص التاني من 2025 أن الدهب هيدخل على موجة ارتفاعات محدش يتخيلها
وده اللي أكده سامح عبد الحكيم، عضو شعبة الذهب، لما طلع وقال إن الأسعار ممكن تكمل في الارتفاع خلال الشهور اللي جاية، خصوصا إن العالم كله عايش توتر سياسي واقتصادي، من اول التضخم اللي بيضرب الأسواق لحد التوترات السياسية، وده بيخلي الناس تهرب للدهب كـ ملاذ آمن
عشان كده توقع وصول سعر الأونصة لـ 3700 دولار في 2025، وسعر جرام الدهب عيار 21 هنا في مصر ممكن يوصل لـ 5100 جنيه يعني لو معاك دهب لازم تحافظ عليه ومتبيعهوش دلوقتي
سامح قال أن سعر الأونصة تقريبا اتضاعف في آخر 4 سنين
من 1764 دولار سنة 2021، لحوالي 3500 دلوقتي
طبعا ده خلاه ينصح الناس ويقولهم اللي عايز يحافظ على قيمة فلوسه يشتري دهب وقت ما الأسعار تهدى شوية.
يعني لما يحصل هبوط مؤقت، دي تبقى فرصة ذكية للشراء وده لأن الدهب مش بس زينة، ده أداة ادخار قوية في وقت الأسواق فيه ضباب وعدم استقرار
كمان ايهاب واصف رئيس شعبة الذهب باتحاد الصناعات، فال إن الدهب هيزيد الفترة الجاية تاني لكن نسبة الزيادة كام بالظبط محدش عارف لسه، وقال أن الدهب عموما صعب ان حد يتوقع ليه سعر وكل اللي بنقول ده مجرد تكهنات
ولما أتساءل عن انسب وقت للشراء قال إن كل الأوقات مناسبة للشراء، لكن الاحسن أن يكون قرار البيع في حالة الاحتياج فقط، وبلاش اي حد يبيع الدهب دلوقتي لان الدهب ملاذ أمن واكبر حماية ليك ولفلوسك
ده حتى على المستوى العالمي فيه توقعات بارتفاعات قوية لأسعار الذهب، زي «فرانسيسكو بلانش»، كبير محللي السلع في بنك أوف أمريكا، الي اتوقع ان الذهب يشهد مكاسب قوية في النص الثاني من 2025، مع احتمال تجاوز سعر الأونصة حاجز 4000دولار بنهاية العام أو بداية 2026
بس اللي هيوضح الرؤية اكتر هو يوم 9 يوليو الجاي، بس ايه اللي هيحصل في الوقت ده تحديدا
اقولك، من المفترض أن ترامب هيفرض رسوم على دول الاتحاد الأوروبي 50% على الواردات بس هو دلوقتي منح مدة للمفاوضات لحد يوم 9 يوليو لو متفقوش هيفرض الرسوم وطبعا ده هيعمل توتر في العلاقات التجارية وهيخلي المستثمرين يروحوا للدهب كملاذ أمن في عز الازمات
وطبعا ده هيزود الطلب على الدهب ومادام الطلب زاد يبقى الاسعار هتزيد، بس في حالة أن ترامب وصل لاتفاق معاهم ومفرضش اي رسوم اسعار الدهب مش هيحصل فيها أي حاجة
يعني كلها كام يوم وتحدد الرؤية اسعار الدهب هتزيد ولا هتستقر
ودلوقتي قولنا شايف ايه احسن وقت تشتري فيه دهب، شاركنا بتعليقك