توقعات بالزيادة خلال شهور الصيف.. امتى تشتري عربية بأسعار مناسبة!
اسعار العربيات مش راسية على بر ساعة في الطالع وساعة في النازل، والناس بتسأل يا تري نشتري ولا نستنى شوية وايه مصير اسعار العربيات الفترة الجاية
بس منتصر زيتون، عضو شعبة السيارات، جاوب على كل الاسئلة دي وقال إن الفترة دي فيه إقبال كبير جدًا على العربيات المستعملة، لدرجة أنها زادت بنسبة 50% عن السنة اللي فاتت رغم إن الأسعار نار
وده لأن المعروض قليل جدا والعربيات الزيرو أسعارها طارت في السما السنين اللي فاتت، فالناس بتلجأ للمستعمل كحل أرحم شوية
وكمال وقال إن السوق كله زيرو ومستعمل بدأ يتحرك في الشهور اللي فاتت، وسعر الدولار في البنوك بقى هو اللي بيحرك كل حاجة.
وعن بعض الماركات، قال إن عربيات زي شيفروليه، نيسان صني، وMG أسعارهم زادت بسبب تأخير التسليمات، فبقى المعروض أقل، والطلب أعلى.
أما التوقعات الجاية فقال ان الصيف ده الأسعار ممكن تعلى أكتر، لان ناس كتير بتحب تشتري قبل السفر أو لأولادهم قبل الجامعة وقبل موسم الساحل والمصايف، يعني متوقع اسعار العربيات تزيد خلال شهر يونيو، يوليو، أغسطس، وسبتمبر، بسبب زيادة الإقبال على الشراء
بس أمجد الفقي، خبير مبيعات وتسويق عربيات، شايف إن أسعار العربيات الجديدة أسعارها مناسبة وان اللي بيحصل في السوق دلوقتي مش طبيعي فيه خصومات وتخفيضات وصلت لـ400 ألف جنيه على بعض الموديلات
وقال أن الكلام ده بدأ من حوالي 3 شهور، لما وكلاء وموزعين قرروا يخفضوا الأسعار بشكل كبير عشان يفضلوا في المنافسة، خصوصًا بعد دخول ماركات جديدة السوق، وكمان مع اتجاه الدولة لتوطين صناعة السيارات
الفقي قال كمان إن بعض الشركات بتفكر بشكل استراتيجي وماشيين بمبدأ أنا ممكن أخسر النهارده، بس أكسب حصة في السوق وأثبت نفسي قدام الشركة الأم
وده ليه؟
لأن كل عربية بتتباع مش بس فيها ربح من تمنها، لكن كمان من الصيانة وقطع الغيار والاكسسوارات بعد البيع، يعني اللي بيشتري دلوقتي ممكن يكون كسبان فعلا
كمان عمر بلبع، رئيس اللجنة العامة للسيارات باتحاد الغرف التجارية، قال إن حصل انخفاض نسبي في سوق العربيات
سبب الانخفاض ان بعض التجار لجأوا لاستيراد عربيات
صينية فيها مواصفات وكماليات مشابهة للعربيات الأوروبية الغالية
وده يجي في محاولة لتوفير بدائل مرضية للمستهلك بأسعار أقل، عشان التجار خلاص بقوا فاهمين المستهلكين عايزين ايه و فهمت احتياجات السوق
بس السؤال هل التخفيضات دي هتستمر؟ ولا دي فرصتك قبل الأسعار ما تعلى تاني؟