أحسن من الدهب 100 مرة.. ومفيش مصنع بيستغنى عنها.. مميزات الاستثمار في الفضة!
ناس كتير دلوقتي فكرت أنها تستثمر في الفضة بعد ما اسعار الدهب زادت ووصلت ل٥ آلاف جنيه، بس بيسالوا ياترى هل الفضة استثمار أمن زي الدهب وممكن فعلا تكسب مبالغ زيه ولا لا
جورج ميشيل، رئيس اللجنة النقابية للمصوغات والمجوهرات، جاوب على كل الاسئلة دي وكشف مفاجآت محدش كان يعرفها عن الاستثمار في الفضة واللي فعلا ممكن الفترة الجاية يحل محل الدهب
جورج قال إن الفضة ممكن تكون الحصان الأسود في 2025، يعني ممكن الفضة تحقق مكاسب أكتر من الدهب السنة دي
وده لإن عليها طلب كبير جدا سواء من المستثمرين أو من المصانع اللي بتستخدمها في الشغل بتاعها وكمان فيه بنوك مركزية بدأت تخزن الفضة مع الدهب كنوع من الأمان المالي
وفيه كمان إقبال كبير دلوقتي على سبايك الفضة، خصوصا على الأوزان الكبيرة زي الـ250 جرام، والـ500، والكيلو،علشان المصنعية فيها أقل كل ما الوزن زاد.
بس على فكرة هو قال أن أسعار الفضة نزلت شوية آخر يومين بسبب إن التوترات بين أمريكا والصين هديت شوية،
وده خلى الأسواق تهدى وسعر جرام الفضة عيار 999 يوصل لـ56 جنيه، بعد ما كان قرب من 57.5 في آخر أبريل
لكن ده مش معناه أن الفضة هتستمر في النزول تاني لا دي كلها فترة وترجع ترتفع تاني يعني لو بتفكر تحط فلوسك فيها اعمل كده وانت مطمن
خصوصا أن الميزة الكبيرة في الفضة، إنها بتتحرك بهدوء في السعر، يعني لا بتقفز فجأة لفوق ولا بتنزل جامد مرة واحدة زي الدهب، وده يخليها اختيار آمن نسبيا للناس اللي بتحب تستثمر على المدى الطويل
بس ميشيل نصح أي حد ناوي يشتري وقال انك لازم تتأكد إن السبيكة عليها دمغة رسمية من مصلحة الدمغ والموازين.
ولازم تاخد فاتورة واضحة بكل التفاصيل زي الوزن، والعيار، والسعر
وفي الآخر، قال إن الدهب والفضة الاتنين أدوات ادخار واستثمار ممتازة، بس أهم حاجة هي انك تنوع استثماراتك علشان تقلل المخاطر وتحقق أعلى عائد ممكن
وبالمناسبة الفضة بدأت السنة دي وسعرها حوالي 28.92 دولار للأوقية، ووصلت لأعلى مستوى ليها يوم 27 مارس لما سجلت تقريبا 34.4 دولار ، يعني اسعار الفضة زادت بقيمة ٦ دولار تقريبا رغم التوترات السياسية اللي أثرت على سعرها
وخليني كمان اقولك أن الفضة كانت ارتفعت بنسبة 8.8% خلال أول 100 يوم من رئاسة ترمب وعشان كده، الفضة
تعتبر فرصة استثمارية كويسة جدا، مش بس علشان سعرها منخفض، لكن كمان علشان ليها استخدامات كتير في الصناعة غير الحُلي والمجوهرات وأدوات الأكل الفضية
هي كمان أحسن مادة بتوصل الكهرباء في العالم، علشان كده بيستخدموها في ألواح الطاقة الشمسية، وكل الأجهزة الإلكترونية، والدوائر الكهربائية، وحتى العربيات الكهربائية
ودلوقتي قولنا فكرت تستثمر في الفضة بدل الدهب.. شاركنا بتعليقك..