كان وكيل نيابة ومحامي.. منصور عامر ملك العقارات في مصر!
منصور عامر اكيد سمعت الاسم ده قبل كده، لان منصور واحد من أشهر واكبر المطورين العقاريين اللي مروا على مصر، قبل ما منصور يعمل الاسم ده منصور مر بحاجات كتير اوي وأولها أنه منصور اصلا كان محامي ومكنش يخطر في باله أنه يشتغل في العقارات، طب ازاي؟
اقولك، منصور اصلا درس في كلية الحقوق واول حاجة اشتغلها وكيل نيابة من سنة 1981 لحد 1987، انت متخيل كام شاب بيحلم بالمنصب ده
بس منصور مش زي اي شاب عشان كده قرر أنه يسيب المجال ده ويدخل يشتغل مع أبوه في المحاماة، بس برضو قلبه ماكانش هناك كان حاسس إنه عايز يعمل حاجة تانية، حاجة ليها طعم تاني
وفعلاً خد القرار اللي غير حياته كلها دخل عالم البيزنس واول حاجه عملها أنه اشتري بيت وهده وكسب وقتها مبلغ محترمه من هنا قرر أنه يدخل مجال العقارات
وبنى مشروع بورتو مارينا واللي كان وقتها من أكبر وأفخم المشاريع في الساحل الشمالي، مدينة كاملة فيها فنادق، شواطئ، مطاعم، ملاهي.كل حاجة تحلم بيها.
وبعد ما نجح هناك بنى بورتو السخنة، أول منتجع سياحي متكامل على الجبال في مصر، مش بس كده ده غمل في سوريا بورتو طرطوس، وفتح كمان في الأردن بورتو البحر الميت، وحتى المغرب كان ليه فيها مشروع اسمه بورتو أغادير يعني مجموعة "بورتو" بقت علامة معروفة في كذا دولة عربية.
واللي يميز مشاريعه، إنها مش مجرد عقارات دي مدن متكاملة، فيها كل اللي الواحد يحتاجه، من ترفيه، وسكن، وصحة، وتعليم حتى.
ومن أهم مشاريعه كمان بورتو جولف مارينا وده مشروع دمج فيه ملاعب الجولف مع السكن، عشان يعمل بيئة كاملة لعشاق الرياضات الراقية.
ده كمان دخل في مجال المطاعم وفتح أول مطعم من سلسلة "تشيليز" العالمية في مصر سنة 1994، وده كان إنجاز ضخم وقتها، لأن محدش كان متعود على الماركات العالمية دي في الأكل.
وبعدها فضل يفتح مطاعم ورا بعضها منهم "كارينوز" الإيطالي، و"ألان لو نوتر"، و"حلقة السمك"، و"ستوديو مصر"، و"ماما"، و"سمبريرو"، يعني تقدر تقول إنه منصور عامر غير شكل السوق في المطاعم الراقية.
ومش بس كده الراجل ليه بصمة كبيرة في الخير والمجتمع، بيساهم في مشروعات صحية، ومجتمعية، وخيرية، لأن النجاح الحقيقي مش بس في الفلوس، النجاح في الأثر اللي بتسيبه في الناس.
يعني قرار أنه يسيب منصب وكيل نيابة اللي الناس كلها كانت ضده كان أكبر قرار صح خده في حياته، لان لولاه عمرنا ما كنا هنشوف كل المشاريع دي
ودلوقتي قولنا ممكن تسيب وظيفتك زي ما عمل منصور عامر عشان تفتح البيزنس الخاص بيك.. شاركنا بتعليقك