عنده 7000 عربية فيراري ومرسيدس.. سلطان بروناي عالم من الخيال!

عمرك سمعت قبل كده عن بلد اسمها بروناى، اهي بروناي دي تعتبر من أغنى الدول الإسلامية، فيها خير ملوش اول من اخر، لدرجة أن الحاكم بتاعها من كتر الفلوس اللي عنده مش عارف بقت كام لحد دلوقتي 

بس مجلة فوربس قالت سنة 2020 إن السلطان حسن البلقية ثروته 20 مليار دولار وفيه كلام أنها وصلت دلوقتي ل30 مليار دولار  وعنده أكبر قصر في العالم، القصر ده فيه  1700 أوضة و 257 حمام و 5 حمامات سباحة و بحيرة فيها 10 أنواع دلافين وجنينة عايش فيها حيوانات من كل شكل ونوع، ده غير قبة قصره المصنوعه من الدهب عيار ٢٢، يعني كانه عايش في قصر من الجنه 

بس المفاجأة كانت في الجراج بتاع السلطان، محدش يعرف مكانه، بس اتقال أنه فيه اكتر من 7000 عربية منهم 365 فيراري  و275 لامبورغيني و 258 أستون مارتن و600 رولز رويس و 440 مرسيدس، وغيرهم كتير من أنواع العربيات زي  أودي، بورش، جاغوار، بي إم، لاند روفر 

منهم عربية رولز رويس من الدهب اشتراها مخصوص لفرح بنته يعني تقريبا كده مفيش عربية فخمة الا واشتراها، وتقدر تقول ان الراجل ده ممكن يركب كل يوم عربية غير التانية لمدة 10 سنين قدام 

عشان كده حسن بلقية معروف عنه من زمان انه عايش في عالم تاني حرفيا حياته كلها صرف وبذخ

بس سلطان بروناي مش بس غني وعايش في رفاهية، ده كمان راجل متعلم ومثقف جدًطا الموقع الرسمي بتاعه بيقول إنه اتدرب كضابط في أكاديمية "ساندهيرست" العسكرية الملكية في إنجلترا ما بين 1966 و1967، ومش بس كده، ده كمان طيار محترف بيعرف يسوق طيارات ومروحيات بنفسه

ومن وقت ما استلم الحكم، بروناي بقت واحدة من أغنى دول العالم بفضل البترول واللي زود ده كمان إنهم خدوا استقلالهم سنة 1984، ومن وقتها بقى نصيب الفرد من الدخل القومي عالي جدا 

وعلى فكرة حسن مسك الحكم سنة 1968، وبقى السلطان الـ29 لبروناي، وكمان صاحب تاني أطول فترة حكم في العالم بعد الملكة إليزابيث.

الراجل ده ماسك كل حاجة في البلد هو السلطان، ورئيس الحكومة، ووزير الدفاع، والمالية، والخارجية.يعني حرفيا البلد كلها في جيبه، والحقيقة أن قدر فعلا يحقق نهضة اقتصادية قوية فيها