كيف تستهدف إيران «رئة الاقتصاد الإسرائيلي» في حيفا؟
امبارح ما كانتش ليلة عادية في الشرق الأوسط.. كانت ليلة فيها صواريخ، انفجارات، صفارات إنذار، وحالة من الذعر ما بين سكان المدن الإسرائيلية، لكن وسط كل دا، في مدينة واحدة كانت هي الأهم وتتصدر عناوين الأخبار .. وهي حيفا.. الضربة الإيرانية كانت موجهة بدقة، مش عشوائية ولا اندفاع، كانت محسوبة، مركزة، وهدفها واضح لخنقة رئة الاقتصاد الإسرائيلي
السؤال هنا .. إيه أهمية مدينة حيفا بالنسبة لإسرائيل؟و ليه إيران اختارت تضرب بالذات؟ و إزاي ضربة واحدة على حيفا تقدر تشل مفاصل الاقتصاد الإسرائيلي؟ وهل الضربة الإيرانية كانت عسكرية بس؟ ولا فيها أبعاد تانية؟
الحقيقة أن الهجوم الإيراني كان صادم بكل المقاييس، وخصوصًا في مدينة زي حيفا اللي إيران ضربتها بقوة، وده لأن المدينة دي مش مجرد منطقة سكنية، ولا حتى مجرد ميناء، دي في نظر الخبراء الاستراتيجيين رئة الاقتصاد الإسرائيلي.. الضرب جاي على منشآت ومصانع ومحطات حيوية بتغذي الدولة كلها، مش بس سكان المدينة.
إيران استهدفت حيفا لأنها ببساطة بتجمع كل حاجة مهمة في مكان واحد..
أول وأهم نقطة، هي أن المدينة فيها واحد من أكبر الموانئ الإسرائيلية، اللي بيتعامل مع نسبة ضخمة من التجارة البحرية لإسرائيل، وده بعد ما بقى ميناء إيلات شبه معطل، وميناء أشدود محدود في قدراته.. يعني لو حصل أي خلل في حيفا، إسرائيل هتختنق اقتصاديًا، وده فعليًا اللي حصل امبارح.
بس مش الميناء هو كل حاجة.. حيفا كمان فيها القلعة الصناعية الأكبر في إسرائيل، منطقة مكتظة بالمصانع الحيوية اللي بتنتج كل حاجة من المواد الكيماوية لحد الأسلحة، مرورًا بالأسمدة ومحطات تكرير الأمونيا.
وده غير إنها واحدة من مراكز تكنولوجيا المعلومات والـ"هاي تك" المهمة جدًا، اللي بتدعم الاقتصاد الإسرائيلي وبتصدر خدمات لدول تانية.
امبارح، إيران ضربت محطة كهرباء ضخمة في المدينة، وده كان من أكتر الأهداف حساسية، لأن المحطة دي بتغذي مناطق واسعة من شمال إسرائيل، ولما المحطة دي تتوقف أو حتى تتعطل جزئيًا، فده بيأثر على المصانع، المستشفيات، وكل البنية التحتية.
ده غير إن الضربة سببت حرائق وانفجارات في المنطقة الصناعية، ومشاهد كانت مرعبة لسكان المدينة اللي هربوا على السلالم وتحت الملاجئ.
أما على المستوى العسكري، فحيفا مش بعيدة عن المعادلة.. فيها قاعدة أميركية مهمة، فيها وحدات تابعة للجيش الأميركي، وميناءها بيرسو فيه قطع بحرية من الأسطول السادس الأميركي.. وده معناه إن أي ضربة هناك مش بس بتستهدف إسرائيل، لكن كمان بتخبط في النفوذ الأميركي في المنطقة. كمان فيها مطار قديم اتأسس من أيام الانتداب البريطاني، ولسه بيستخدم في حاجات عسكرية ولوجستية.
ومن الناحية السكانية، لازم نفتكر إن حيفا تعتبر تالت أكبر مدينة في إسرائيل بعد القدس وتل أبيب، وده يعني إن الضربة ما كانتش بس موجهة للبنية التحتية، لكن كمان ضغط نفسي على الرأي العام، وتهديد مباشر لحياة المدنيين، وهو أمر بيأثر على المعنويات في الشارع الإسرائيلي بشكل واضح.
الرسالة اللي إيران كانت عايزة توصلها بسيطة بس موجعة: احنا نقدر نضرب في قلبكم.. في أهم مكان عندكم.. ولو كملتوا، هنكمل إحنا كمان".. ودي مش أي رسالة.. دي كانت صفعة استراتيجية على وجه الاحتلال
