اللي سرقهم ميخطرش على بال حد.. أشهر سرقات نجوم الفن والكورة!

حياة نجوم الفن ولاعيبة الكورة مش كلها وردي زي ما ناس كتير فاكرة، دول بيتعرضوا لأزمات مش كتير يقدروا عليها، وفي ثانيه شقى عمرهم بيضيع على ايد اقرب الناس ليهم

وخلينا الاول نبدء بالنجمه غادة عبد الرازق اللي اتسرق من فيلتها دهب وهدوم غالية من فيلتها وساعتها اتهمت الخدمتين اللي بيشتغلوا عندها بالسرقة وفعلا الحكومة قدرت تقبض عليهم

كمان الفنانة الإماراتية أحلام كان سبق و قدمت شكوى رسمية بعد ما اتعرضت للسرقة في باريس، لما اكتشفت إن شنطة من شنطها اختفت، والشنطة دي كانت فيها مجوهرات ولبس بقيمة حوالي 100 ألف يورو

ودي مش أول مرة يحصلها كده، دي المرة التانية، لإنها في سنة 2016 برضو اتعرضت للسرقة في باريس، وساعتها اتسرقت منها ساعة رولكس كانت برضو بـ100 ألف يورو 

كمان   عماد متعب، لاعب الأهلي السابق،  فيلته اللي في المعادي، اتعرضت للسرقة وساعتها تحريات أجهزة الأمن كشفت إن الخدامة هي اللي ورا السرقة دي بعد ما استولت على  دهب يخص مراته، وكمان مبلغ مالي، بس رجال المباحث قدروا يقبضوا على المتهمة.

ده كمان نفس اللي حصل مع الفنان تامر عبد المنعم، لما الخدامه سرقت مشغولات دهب وساعات غالية من شقته اللي في حي الدقي، وبعد كده هربت

بس الفنان بلغ عن الواقعة أول ما اكتشف اختفاء الحاجات دي، والمباحث في مديرية أمن الجيزة نجحت في القبض على الخدامة وشريكها، والنيابة أمرت بحبسهم على ذمة التحقيق.

و الفنانة ميرهان حسين اتعرضت لسرقة شقتها واتاخد منعا مبلغ مالي ومشغولات دهب، ووقتها ميرهان وجهت الاتهام لعدد من العمال إنهم ورا السرقة، وقدرت المباحث تقبض على المتهمين، والنيابة أمرت بحبسهم على ذمة التحقيق، ولما اتحالوا على المحاكمة، قضت بحبس سنة للمتهم الأول، و6 شهور للتاني

ده حتى محمد عبد الواحد، لاعب الزمالك السابق، فئاته في مدينة الشيخ زايد، اتسرق منها أجهزة كهربائية وحاجات من جوه الفيلا على ايد حرامي استغل غياب اللاعب عنها، لكن الشرطة قدرت أنها توصله وتقبض عليه

ودلوقتي قولنا إيه أغلى حاجة اتسرقت منك.. شاركنا بتعليقك؟