جمع 600 مليون دولار قبل ما يتولى الرئاسة.. ثروة الرئيس الأمريكي ترامب
عمرك سالت نفسك في يوم من الايام ياترى شخصية زي ترامب رئيس امريكا عمل ثروة قد ايه وياترى بيستثمر فلوسه فين
اهو ترامب بنفسه جاوب على كل الاسئلة دي بكل صراحة، لما قدم إفصاح مالي خلال الساعات الاخيرة عن مصدر ثروته، ترامب حقق دخل أكتر من 600 مليون دولار، قبل ما يتولى الرئاسة و قيمة أصول ثروته وصلت لـ1.6 مليار دولار يعني
الإفصاح اللي قدمه ترامب شمل كل حاجة، من العملات المشفرة اللي بيملكها، لحد دخله من العقارات والصفقات اللي بيعملها مع مطورين أجانب مقابل استخدام اسمه يعني تقدر تقول عليه أنه راجل اعمال من الدرجة الأولى مش بيفوت اي فرصة غير لما يستفاد منها
صحيفة "واشنطن بوست" قالت إن الإفصاح المالي ده كان في 234 صفحة،واتنشر مع مجموعة إفصاحات لمسئولين في البيت الأبيض،وبيكشف تفاصيل جديدة عن فلوس ترامب في سنة 2024،قبل ما يرجع تاني رئيس لفترة تانية
زي انه جمع مبالغ كبيرة خلال حملته الانتخابية، من بيع منتجات وتسويق حاجات باسمه.
بس أكبر مصادر دخله كانت حصته في منصة العملات المشفرة "ورلد ليبرتي فاينانشيال"، اللي جابت له لوحدها 57.3 مليون دولار من المبيعات، وبحسب الإفصاح، ترامب بيملك فيها حوالي 15.75 مليار "رمز حوكمة".
.
لكن لسه مفيش تفاصيل واضحة عن أرباح ترامب من عملته الرقمية الجديدة اللي نزلت في يناير اللي فات، واللي سبق وأعلن عنها وده يفسر تشجع ترامب للعملات المشفره كاستثمار اكتر من الدهب
بس هو قال كمان إنه كسب مئات الملايين من الدولارات من خلال العقارات بتاعته اللي فيها ملاعب جولف وفنادق،
وأكتر حاجتين جابوله دخل كانوا منتجع "ترامب ناشونال دورال" اللي جاب له أكتر من 110 مليون دولار، و"منتجع مارالاجو" اللي جاب له دخل أكتر من 50 مليون دولار.
لكن في نفس الوقت، المشاكل القانونية لسه بتلاحقه في 2024، عشان عليه أكتر من 50 مليون دولار لكل من "إي. جين كارول" اللي كانت رافعة عليه قضية،والمدعية العامة في نيويورك اللي اتهمته في قضية
الإجمالي اللي صدر ضده في أحكام وصل لحوالي 90 مليون دولار في حكمين، و350 مليون دولار كمان (غير الفوايد) في قضية الاحتيال المدني.
ومع ذلك، ترامب قال في الإفصاح إن المدفوعات دي "لسه تحت الاستئناف".
التقرير كمان بيكشف إنه كسب 1.3 مليون دولار من بيع نسخة خاصة من الكتاب المقدس، و2.8 مليون دولار من ساعات عليها اسمه "ترامب"، و2.5 مليون دولار من بيع أحذية وعطور ماركة ترامب، و3 مليون دولار من كتابه اللي اسمه "أنقذوا أمريكا"
والحقيقة أن كل ده بيزنس محدش كان يتخيل أن ترامب بيستثمر فيه، ده حرفيا مش سايب اي حاجة غير وهو متاكد أنه هيكسب منها