بنوا منصة في نص البحر.. مشروع ضخم لتطوير حقل غاز البرلس
شركة خدمات البترول البحرية PMS، أعلنت عن إنجاز جديد رفع راس مصر، الشركة دي قدرت أنها تركب منصة الغاز البحريه الجديدة "WEB Offshore" في منطقة غرب البرلس، وده جزء من مشروع ضخم لتطوير حقل غاز في إدكو
اللي مصر بتراهن عليه عشان تغطي احتياجاتها من الغاز وتزود التصدير لأوروبا، الجميل في كله ده أن التنفيذ كان بسرعة ودقة
أول حاجة ركبوها هو الجاكت البحري بوزن 345 طن، وبعدها سطح التشغيل "Deck" اللي وزنه 431 طن
كل ده باستخدام الوحدة العملاقة PMS 12، وكل ده حصل من غير أي حوادث، وفي الميعاد المحدد بالظبط
يعني ببساطة الشركات الوطنية بقت بتنفذ مشاريع بحرية معقدة من غير ما تستعين بحد من بره
مش بس كده PMS كانت قبل كده نزلت خط أنابيب بحري بقطر 8 بوصة، ودلوقتي شغالة على خط تاني بقطر 14 بوصة وطول 32 كم، لا ولسه جايين كمان يركبوا منصة تانية قريب اسمها "Papyrus"
محمد سمير، رئيس شركة رشيد للبترول والبرلس للغاز، قال إن من المخطط خلال السنة المالية الحالية إن معدل الإنتاج يرتفع لـ 320 مليون قدم مكعب غاز يوميًا، وده بسبب دخول آبار جديدة على الإنتاج، وده بيكون زيادة عن السنة اللي فاتت 2023/2024 اللي كان متوسط إنتاجها 222 مليون قدم مكعب غاز في اليوم.
وقال إن بفضل الجهود اللي بتبذلها الشركة بشكل مستمر، خصوصا من فريق إدارة الآبار والخزانات والتسهيلات، قدروا يقللوا من معدل التناقص الطبيعي في الإنتاج
الفريق ده قدم أفكار مبتكرة فعلاً عشان يزودوا الإنتاج، ونفذوا خطط مدروسة كويس جدا علشان يعظموا الاستفادة من الآبار القديمة، وده ساعد إنهم يرجعوا يشغلوا آبار كانت متوقفة وترجع للإنتاج تاني، وتم التحكم فيها باستخدام الوحدة البحرية (PMS Burullus)، وده كله ساهم في رفع الإنتاج الكلي.
مش بس كده دي الشركة نجحت إنها تحط آبار المرحلة العاشرة من مشروع تنمية غرب دلتا البحر المتوسط (WDDM) على خريطة الإنتاج، واللي عددهم تلات آبار، بإجمالي إنتاج يومي وصل لـ 160 مليون قدم مكعب غاز، وكمان 2000 برميل متكثفات.
وقال كمان إنهم قدروا يتغلبوا على التحديات اللي واجهتهم في تنفيذ المشروع ده، وده من خلال استغلال الإمكانيات المتاحة عندهم والبنية التحتية اللي موجودة أصلًا، وده ساعد كمان في رفع الجدوى الاقتصادية للمشروع.
يعني خلاص مصر دلوقتي بقى عندها القدرة إنها تدير دورة تطوير حقول الغاز البحرية من أول التصميم لحد الإنتاج،
وبأيد مصرية 100%