لو دفعته في فرنسا هتندم.. 8 دول تمنع دفع البقشيش نهائيا!

البلاد اللي هقولك عليها دلوقتي لو روحتها لازم تفكر ١٠٠ مرة قبل ما تدفع بقشيش فيها، عشان شكلك ميبقاش وحش قدامهم

يعني مثلا سويسرا مفيش حاجة اسمها بقشيش إجباري، لإن الخدمة متضمنة في السعر بالقانون، بمعنى ان لو الأكل بـ100 فرنك ال100 دي شاملة كل حاجة، حتى حق الناس اللي شغالة

ومتقلقش، الموظفين هناك بياخدوا مرتبات كويسة جدا، البلد دي أصلاً تعتبر واحدة من أعلى البلاد من الحد الأدنى للأجور 

أما في الأرجنتين القانون هناك بيقول  إن البقشيش ممنوع في الفنادق والمطاعم، بس على أرض الواقع، الناس لسه بتاخده، وكمان بيعتمدوا عليه بشكل كبير تخيل إن البقشيش هناك ممكن يوصل لـ40٪ من دخل العامل، يعني هو قانونا لأ، بس فعليا أه موجود البقشيش ومحدش بيطبق المنع بجد

وفي البلجيكا الأجور هناك حلوة، فمفيش ضغط على الزباين إنهم يسيبوا بقشيش، بس لو سبت مش هيقولولك لأ

يعني تقدر تسيب بقشيش من باب الذوق، بس مفيش حد هيبصلك وحش لو ما عملتش كده.

ولو سافرت فرنسا فهتلاقى بقى الدنيا مختلفة تماما، محدش بيستنى بقشيش ولا بيتوقعه، ولو جيت تسيب ممكن الموظف يرفضه بأدب، وفيه مطاعم بتكتب على الفاتورة إذا كانوا بيقبلوا بقشيش ولا لأ، عشان ما تحرجش نفسك وتبقى فاهم النظام من الأول

وفي سنغافورة بقى الموضوع هناك مش واضح 100%، بس الحكومة مش بتحبذ موضوع البقشيش، يعني لو سبت مبلغ بسيط مش هيضايقوا، بس عامة مكتوب في موقعهم الرسمي."البقشيش مش أسلوب حياة"

لكن في اليابان بقى أوعى وأنت هناك تسيب بقشيش ده هناك ممكن يعتبروه إهانة لإن ثقافتهم إنهم بيشتغلوا بإتقان لمجرد إنهم فخورين بشغلهم، ومش بيستنوا مقابل إضافي، فأي بقشيش هناك ممكن يترد عليك أو يسببلك إحراج كبير

كمان البقشيش كان ممنوع رسميًا في الصين زمان، وكانوا بيعتبروه نوع من الرشوة، ولسه لغايه دلوقتي ناس كتير بتعتبره مش لائق.

يعني لو حاولت تدي بقشيش في مطعم أو تاكسي، غالبا هيترفض وممكن يزعلوا منك، ماعدا المرشدين السياحيين وسواقين الباصات السياحية، دول عادي تديهم "حاجة بسيطة" تقديرا لتعبهم

نفس النظام بتاع اليابان والصين، موجود في كوريا البقشيش هناك مش بس مش متوقع، لأ ده ممكن يترفض في وشك.

يعني لو فكرت تسيب بقشيش، غالبًا هتلاقي اللي قدامك بيقولك: لا شكرا

من الاخر مش كل مكان في العالم زي مصر أو أمريكا في حكاية البقشيش، في بلاد شايفاه تقدير وشيك، وبلاد تانية شايفاه "قلة ذوق" أو حتى مخالفة للقانون