من القاهرة للساحل في ساعة؟.. رحلة بـ75 ألف جنيه تخلصك من الزحمة وتوصلك البحر وانت بتشرب قهوتك
السفر دلوقتي من القاهرة لمراسي في الساحل الشمالي في ساعة.. بس بـ 75 ألف جنيه؟.. آه يا معلم، ما سمعت كدا.. إنت دلوقتي تقدر توصل الساحل الشمالي في 60 دقيقة بس من قلب القاهرة، وأنت راكب هليكوبتر خاصة فاخرة، فيها تكييف وأمان وكابتن بيقولك "welcome on board"، وسعر الفرد الواحد فيها يوصل لـ 1500 دولار، يعني قرابة 75 ألف جنيه مصري.
ولو مزاجك رايق أكتر ومعاك الشلة، تقدر تحجز الطيارة كلها بـ 8750 دولار يعني حوالي 430 ألف جنيه وتطيروا لوحدكم لحد البحر والموج والراحة.
إيه الحكاية؟ ومين وراها؟
اللي ورا الموضوع ده شركة مصرية اسمها سويفت جيت للطيران، شركة لسه جديدة نسبيًا، اتأسست في 2022، بس جاية برؤية مجنونة شوية…
بدل ما تنام 3 ساعات في الزحمة على طريق الساحل، أو تشيل هم الحوادث والعطش والبنزينة، هما جابوا لك الحل من الآخر .. اركب هليكوبتر، وارتاح.
الرحلة رايحة فين؟
الطيران بيبدأ من مطار ألماظة بالقاهرة، ويوصلك على أشهر وأغلى قرى الساحل الشمالي، زي مراسي ورأس الحكمة وسيدي عبدالرحمن، يعني هتنزل على بوابة الفيو والشاطئ مباشرة، من غير ما تشوف عفرة الطريق الصحراوي ولا تفتيش وكمين ولا سخونة الكرسي في العربية.
طب السعر ده مين يستحمله؟ واضح كدا أن الخدمة دي مش معمولة الغلبان، ولا حتى للطبقة الوسطى، دي معمولة لـ رجال أعمال محتاجين يوصلوا بسرعة، والمشاهير والنجوم عايزين خصوصية وسرع، طبعا أصحاب الساحر الشرير و د"هاي كلاس" ومعاهم ميزانية مفتوحة.. أو حتى 6 أصحاب قرروا يقسموا تمن الرحلة ويعيشوا لحظة العمر
الطيارة عاملة إزاي؟.. اللي هتركبه مش أي هليكوبتر، دي طيارة فخمة جدًا اسمها AgustaWestland AW139 ودي تعتبر من الطيارات الفخمة في العالم، بتستخدمها شركات نفط وطيران VIP، فيها مقاعد جلد مريحة وعزل صوتي ونظام ملاحة متطور والأهم: تجربة رايقة ومليانة رُقي
وقت الرحلة بيبقى كام؟ .. الرحلة بتستغرق حوالي 60 دقيقة فقط.. يعني وانت لسه بتغلي مية القهوة على طريق وادي النطرون، راكب الهليكوبتر يكون بيشربها على بلكونة مطلة على البحر
إيه أهمية الخدمة دي؟ .. الخدمة دي تعتبر "نقلة نوعية" في مصر؟.. أول مرة يبقى عندك وسيلة نقل VIP جوية داخلية منتظمة بمستوى ده.. و بتوفر وقت ومجهود بشكل خرافي.. كمان بترفع من قيمة السياحة الفاخرة والاستثمار في مصر.. وكمان بتدي انطباع للعالم إن مصر بقت على خريطة الطيران الخاص والنقل الذكي.
وإيه اللي ممكن يحصل بعد كده؟
لو التجربة دي نجحت، هنشوف شركات تانية تدخل في نفس المجال، وهنسمع عن مطارات هليكوبتر خاصة في الكمبوندات الكبرى، وممكن جدًا تبقى في خدمة "أوبر هيليكوبتر" من المطار لأي منتجع في مصر.
في الآخر.. اللي سويفت جيت عملته هو نقلة جديدة في فكرة السفر في مصر.. فمش لازم تكون طيارة خاصة بمليون جنيه علشان تعيش رفاهية، ومش لازم تضيع يومك كله في زحمة الطريق علشان توصل البحر.. دلوقتي، اللي معاه 75 ألف جنيه بس، يقدر يطير فوق الزحمة، ويروح الساحل وهو لابس شورت، مش لابس همّ الطريق
