فرصة عمرك وقت الحروب والأزمات.. ساويرس بيرسم أحسن خطة للاستثمار في 2025
تفتكر لو معاك مليون جنيه دلوقتي.. تحطهم فين؟ .. دهب؟ عقار؟ شهادات بنكية؟ ولا تسيبهم كاش مستني الفرصة تيجي؟
طب إيه رأيك لو نجيب ساويرس اللي هو واحد من أغنى رجال الأعمال في مصر والمنطقة قالك بصراحة: الأزمة مش خطر.. الأزمة فرصة
يعني إنت شايف الحرب وحالة عدم اليقين الاقتصادي حوالينا.. وساويرس بيقولك كمل استثمار
آه، هو شايف كده.. مش بس شايف، ده كشف عن روشتة كاملة للربح في 2025، خلال لقائه مع العربية بيزنس.. روشتة ما بين الدهب والعقار والكاش والسياسة، وكلها مبنية على خبرة طويلة وجرأة محسوبة.
أول خطوة.. افهم تكلفة المنتج قبل ما تشتريه
ساويرس بدأ كلامه من منجم الدهب.. مش من سوق الصاغة، قالك إن تكلفة استخراج أونصة الذهب بتتراوح ما بين 1200 لـ1500 دولار، يعني حتى لو السعر العالمي نزل، لسه فيه مكسب.. لأن هو داخل المعادلة من جوا، مش من برا.
وده معناه إن اللي فاهم دورة المنتج وسلسلة التوريد، عمره ما يخسر.. والسؤال هنا انت بتشتري الدهب عشان تحوش؟ ولا عشان تحوّط؟ ولا بس علشان شكله حلو؟
تاني خطوة الكاش مش كسل.. ده خطة!
ساويرس قال بوضوح: لازم تحتفظ بـ25% لـ30% من استثماراتك كاش.. ليه؟ .. علشان أول ما السوق يهتز.. تشتري.. أول ما الناس تجري.. انت تدخل.. لأن الفرص في وقت الأزمات ما بتستناش.. بتعدي زي القطر، يا تركبه.. يا تبصله من بعيد وتندم
فهل انت محضر نفسك تشتري لما الكل يبيع؟ ولا هتبقى ضحية زحمة الخوف؟
تالت خطوة اتكلم عنها ساويرس وهي العقار.. الملك في لعبة الأرباح والمكسب
لأن رغم كل الكلام عن الذهب والدولار، ساويرس شايف إن العقار لسه هو البطل الحقيقي في 2025 خصوصًا في دول عندها استقرار نسبي زي الإمارات، تركيا، المغرب، ومصر.
ليه؟.. لأن العقار بيفضل محافظ على قيمته، وبيقدر يواكب التضخم، وبيتحول لمصدر دخل لو موجّه للإيجار أو الاستثمار السكني.
وقالك كده بالحرف: و اشتريت في المكان الصح.. في التوقيت الصح.. عمر العقار ما هيخسرك
فاحنا كدا مقارنة مش سهلة .. لو معاك مليون جنيه.. تحطهم في شقة؟ ولا في 3 كيلو دهب؟
رابع خطوة.. في روشتة نجيب ساويرس هي ربط استثمارك بالواقع السياسي
ساويرس مش بيشوف الاستثمار مجرد أرقام.. هو شايف إن السياسة بتأثر على السوق أكتر من الفايدة.. مثال دولة لبنان .. مش هترجع تشتغل استثماريا غير لما يبقى فيه جيش مسيطر وسلاح حزب الله يبقى في ايد الدولة
سوريا مثلا .. ممكن ترجع لو حصل ضبط للحريات والتطرف.. العراق؟ .. الوضع هناك مباشر بالخير .. وساويرس شغال بمشروع عقاري هناك بالفعل
خامس خطوة.. وضحها ساويرس انك ما تخافش من العاصفة.. بس استغلها.. لكن ازاي؟
الكل قاعد مستني الحرب تخلص.. التضخم يقل.. البورصة تستقر.. لكن ساويرس شايف إن اللي بيستنى الهدوء عمره ما هيكسب. وقال: اللي معاه كاش دلوقتي.. هو اللي هيصطاد الفرص قبل غيره، الفرص الحقيقية بتيجي في عزّ الأزمة.. مش بعد ما تعدي.. يعني لو مستني الوضع يبقى مطمئن.. هتكون ضيعت النُص التاني من الرحلة.
فهل .. هتفضل مستني الدنيا تهدى؟ ولا هتبدأ تلحق فرص الاستثمار دلوقتي؟
من الآخر كدا .. روشتة ساويرس على السريع هي فهم تكلفة الاستثمار.. مش بس سعره وانك تخلي جزء من محفظتك كاش.. وتراهن على العقارات في الدول المستقرة بقلب مطمن وتابع المشهد السياسى كويس ومتخليش الأزمة توقفك.. خليها تشتغلك..
في 2025، العالم مش ثابت.. واللي يكسب هو اللي يتحرك أسرع، ويفكر أعمق، ويغامر بحساب.. ساويرس حطلك الخطة.. الكورة بقت خلاص في ملعبك.. ورينا هتجيب جون ازاي
