جمعت تريليون دولار في 500 يوم.. انفيديا شركة صناعة الألعاب وكروت الشاشات
ناس كتير ممكن متكونش سامعة عن إنفيديا، عكس أسماء زي أبل ومايكروسوفت وجوجل،.بس الغريب إنك ممكن تكون دلوقتي قاعد على لابتوب فيه شريحة من إنتاج الشركة دي
لأن ببساطة إنفيديا دلوقتي هي أكبر شركة في العالم في مجال صناعة شرائح الرسومات أو زي ما بنقول عليها "كروت الشاشة".
حكاية الشركة بدأت سنة 1993، مش في مكتب فخم ولا شركة كبيرة بدأت من مطعم صغير في كاليفورنيا، 3 مهندسين قاعدين بيحلموا بمستقبل الرسومات في الكمبيوتر،
شافوا إن كروت الشاشة ممكن تبقى أكتر من أداة للألعاب،
ممكن تستخدم في أبحاث، في محاكاة، في الذكاء الاصطناعي حاجات كتير كانت في وقتها شبه خيال
ومن يومها، وإنفيديا ماشية في السكة الصعبة، بس كانت دايمًا بتنجح وتسبق في عالم الألعاب، كروت إنفيديا كانت قفزة جبارة
والحقيقة أن سر نجاح الشركة هي جودة منتجاتها اللي كانت بتتميز بصورة أنضف، سرعة أعلى، جرافيك واقعي يخليك جوه اللعبة، عشان كده الناس حبت ده، والطلب زاد، والسوق كبر
ولما حصلت الأزمة الصحية في 2020، والناس قعدت في البيت،الكل بدأ يلعب، وكروت إنفيديا بقت مطلوبة أكتر وفي نفس الوقت، العملات الرقمية ارتفعت نار، والمعدنين كانوا بيجروا على كروت إنفيديا
وده رفع قيمة الشركة السوقية بشكل بجنون، وعدت وقتها الـ800 مليار دولار، لكن الدنيا ما بتفضلش على حالها
في 2022، السوق وقع، العملات الرقمية نزلت، وأسهم إنفيديا انهارت،ووصلت قيمتها لأقل من 300 مليار دولار.
بس اللي حصل بعد كده كان مفاجأة في 2023، إنفيديا رجعت وبقوة، نتايج أرباحها كانت خرافية، وتوقعاتها فاقت كل التوقعات، وده خلّى سعر السهم يطير، والشركة تدخل نادي التريليون دولار ولو لفترة قصيرة
النادي ده مش بيدخله غير الكبار أوي أبل، مايكروسوفت، أمازون، جوجل، أرامكو ودلوقتي، إنفيديا
الغريب أن الشركة خدت 500 يوم علشان توصل من 500 مليار لـ تريليون، يعني في تلت الوقت اللي أبل نفسها خادته علشان توصل لنفس الرقم
ورغم إن إنفيديا خطفت الأضواء بأدائها القوي بسبب الطفرة اللي حصلت في مجال الذكاء الاصطناعي، إلا إنها ما كانتش الأولى، لكنها دخلت ضمن أقوى خمس شركات تكنولوجيا أداء في 2024
وفي نفس الوقت، العملات الرقمية رجعت للساحة بقوة وخصوصا عملة بتكوين اللي كسرت أرقام قياسية،
وده خلى أسهم الشركات المرتبطة بمجال التشفير تطير لفوق، وتتصدر المشهد
إنفيديا مش بس شركة كروت شاشة دي دلوقتي بتقود ثورة في الذكاء الاصطناعي، والروبوتات، والسيرفرات، وحتى في السيارات الذكية