صفقات جديدة بالمليارات في سواحل مصر.. ودا اللي هيحصل في رأس شقير!

رئيس الوزراء مصطفى مدبولي طلع في مؤتمر صحفي وقال كلام مهم جدا، قال إن فيه صفقات كبيرة لسه تحت التفاوض، وإن الإعلان عنها هيتم خلال 2025

الصفقات دي مش في مكان واحد، لأ دي في أكتر من منطقة، سواء على البحر الأحمر أو الساحل الشمالي

من ضمن المناطق اللي اتكلم عنها، رأس بناس ودي  كتير ميعرفوش عنها انها واحدة من أكبر تجمعات الشعاب المرجانية الموجودة في العالم، اهي المنطقة دي دلوقتي بيجهزوها لطرحها على مستثمرين كبار

وبيقولوا كمان إن فيه 4 لـ5 مناطق تانية على البحر الأحمر بيتجهزوا زيها هيبقوا زي رأس الحكمة، المشروع اللي اتفتح بالشراكة مع الإمارات، واللي مصر قبضت منه 35 مليار دولار ومش بس كده، الحكومة لسه محتفظة بـ35% من المشروع يعني لسه شريكة فيه

 الجديد بقى في رأس شقير المنطقة دي على البحر الأحمر، مصدر حكومي قال لموقع انتربرايز، إن مصر خلاص بتجهز صفقة ضخمة هناك، مع صندوق خليجي سيادي وهيبقى فيها تمويل بطريقة جديدة

 الصفقة دي مش بس استثمار، دي كمان جزء من خطة الدولة لحل أزمة الدين العام.

 الأرض هناك مخصصة رسميًا لوزارة المالية، والتمويل هيتم من خلال صكوك سيادية محلية يعني هيتطرح أوراق مالية على مشاريع معينة، والمستثمرين يشتروا فيها والعائد يروح لتقليل الدين بدل ما الدولة تبيع الأرض

وعلى فكرة المشروع مش بس سياحة، ده كمان في طاقة متجددة، هيدروجين أخضر، صناعات ثقيلة يعني شغل استراتيجي كبير جدًا والهدف إن المنطقة دي تتحول لمركز إقليمي للاستثمار والتصنيع

بس الأهم من ده كله إن مصر بدأت تتحرك بشكل قوي، بتحول ودائع دول زي قطر والكويت لاستثمارات

يعني مثلا قطر قالت إنها هتحط 7.5 مليار دولار، وكمان في وديعة كويتية بـ4 مليار دولار نصها هينتهي في سبتمبر الجاي.ط، بس هما بيحاولوا يدخلوا بيها استثمارات بدل ما يخرجوا بالدولار

اللي لازم تعرفه دلوقتي مش بس بتبيع أراضي لمستثمرين، لأ دي بتبني شراكات حقيقية، وبتستخدم أدوات تمويل حديثة زي الصكوك عشان تحل أزمات زي الدين العام من غير ما تفرّط في أصولها. 

يعني اللي حصل في رأس الحكمة كان البداية، لكن اللي جاي في رأس بناس ورأس شقير ممكن يكون أكبر بكتير