وظيفة النوم مرتبها هيصدمك.. أغرب 7 وظائف في العالم!

نبدأ بأغرب وظيفة سمعتها في حياتك متذوق أكل محترف، الوظيفة دي طلبتها شركة أغذية أسترالية لما نزلت إعلان إنها عايزة شخص شغلانته الوحيدة إنه يدوق أكل ويقيم الطعم

طيب المرتب قد إيه؟

50 ألف جنيه إسترليني في السنة، يعني أكتر من 3 مليون جنيه مصري، وفوق كل ده الشركة بتبعتك تسافر آسيا وأمريكا الجنوبية، وتوفر لك إقامة كاملة، يعني هتاكل وتسافر، وتاخد فلوس كمان 

لا ولسه ده فيه وظيفة اسمها "معالج نفسي للحيوانات"، يعني لو بتحب القطط والكلاب، فالشغلانة دي ليك

وكل اللي عليك اعمله فيها انك تتعامل مع الحيوانات اللي عندها مشاكل  نفسية زي اكتئاب، توتر، صدمة من عنف أو تشرد،  عان تهديهم وتساعدهم يتعافوا 

مرتب الوظيفة دي 35 ألف دولار سنويًا، يعني حوالي مليون ونص جنيه مصري

بس كل اللي فات حاجة والوظيفة دي حاجة تانية خالص دي اللي تقول عليها وظيفة الاحلام اللي كلنا بنحلم بيها وهي وظيفة النوم أيوة النوم بقى وظيفة في الفنادق 

وده لان فيه فنادق بتطلب أن يكون فيه موظف يتواجد في غرفة فندق 35 يوم علشان يختبر الراحة وجودة السرير، ولو السرير وحش بيكتب تقرير لو حلو بياخد قيلولة، وطبعا بتاخد إقامة كاملة في الفندق ومرتب كمان 

ومن النوم نروح ل"مدفئ السرير"، ايه حكاية الوظيفة دي كمان؟

اقولك في فنادق فخمة، بيجيبوا ناس تنام شوية في السرير قبل وصول النزيل علشان السرير يبقى دافي ومريح

الوظيفة دي مرتبها 24 ألف دولار سنويًا، وفيها إقامة كاملة وأكل وشرب على حساب الفندق، يعني مش بس بتدفّي السرير،  بتدفي جيبك كمان 

أما في تايوان فيه وظيفة للبكاء ناس شغلانتها إنها تروح الجنازات وتعيط بصوت عالي، وتصرخ، وتبان حزينة جدًا

علشان اللي حوالين المتوفي يحسوا إنه كان شخص محبوب

أما لو انت من الناس اللي مش بتقدر تقف طوابير في ناس ممكن تقف مكانك في طوابير الانتظار مقابل 1000 دولار في الاسبوع يعني بالمصري 50 الف جنيه 

أما آخر حاجة فهي وظيفة غريبة فعلاً مطارد قرود، ودي موجودة في بعض الدول، وخاصة في المناطق السياحية، فيه ناس شغلها يطاردوا القرود علشان ما تقربش من السياح، ولا تسرق أكلهم، ولا تعمل دوشة في المكان.