اختراعه في كل بيت.. مين هو حاتم زغلول مخترع الواي فاي؟

حاتم زغلول اتولد واتعلم في مصر، واتخرج من كلية الهندسة جامعة القاهرة، قسم هندسة إلكترونية، ودرس كمان  رياضيات تطبيقية في جامعة عين شمس، يعني دماغه كانت شغّالة حسابات وبرمجة من بدري جدًا

بعد كده حاتم قرر يسافر كندا عشان يكمّل تعليمه وحياته

وفي الأول زي أي شاب مسافر اشتغل شغلانات كتير، وبدأ من تحت الصفر، بس كان دايمًا حاطط هدف في دماغه "أكمل أبحاثي، وأدرس أكتر"

وفعلاً كمل، وخد الماجستير والدكتوراه في الفيزياء، وكان تركيزه على المغناطيسية والاتصالات.

في الوقت ده كان شغال في شركة اتصالات في  كندا، ومعاه زميله وصاحبه اللبناني الأصل د. ميشيل فتوش،

الشركة طلبت منهم يشتغلوا على تطوير نظام أسرع لنقل البيانات، لإن الترددات كانت بطيئة والإنترنت ماكانش في أحسن حالاته وقتها.

وهنا حاتم عمل دراسة واكتشف أن السرعات فعلا ضعيفة جدا، بعدها نجح في اختراع تقنية الـ WOFDM و الـ MCDSSS، ودي التكنولوجيا هى اللي اتبنت على أساسها الـ"wifi" والـ"4G" و بنى عليها الـ"3G" ودي كانت بداية انطلاقه

ومن ساعتها  التليفونات المحمولة بقت بتشتغل بالتقنية دي من اول سنة 1993 وبسبب اختراعه ده  مبيعات الشركات وصلت وقتها ل2مليار دولار، بعدين تم تكليفه من تاني لتسريع الإنترنت والواي فاي، لحد ما وصل هو وزمايله للفور جي "واللي بقت التكنولوجيا الأولى في العالم حاليا

يعني ببساطة الراجل ده كان واحد من اللي خلونا نقدر ندخل على الإنترنت من غير سلك، اللي خلى العالم كله يبقى "متوصل" ببعضه بدون كابلات، وبدون حدود 

وعشان كده زغلول قدر أنه ياخد عدد من الجوائز زي جائزة Farder Milner Casgrain Pinnacle لريادة الأعمال، وجائزة كالجاري للمهاجرين المتميزين في كندا وغيرها كتير

والجميل في حاتم أنه دايما بيعتز ببلده وتعليمه فيها ودايما بيقول "مصر ولادة، فيها عقول عظيمة جدًا، بس محتاجة ثقة وتشجيع، وأنا من الناس اللي اتعلمت في مدارس حكومية، مكنش فيه دروس خصوصية، بس كان فيه تعليم حقيقي بس الأهم من ده كله ان زغلول وجه رسالة للشباب وقالهم: "سيبك من الإحباط والكلام السلبي، ذاكر، اتعلم، اشتغل على نفسك… ومتبصش للفلوس في الأول، لما تنجح الفلوس هي اللي هتدور عليك