القشطوطة سر نجاحه.. مؤمن عادل صاحب بلبن وبهيج جاب فلوسه منين؟
عارف سلسلة "كرم الشام" اللي دايمًا عليها زحمة أو "بلبن" اللي مهما روحت تلاقي الناس واقفة طوابير، وأكيد شفت فيديوهات "عم بهيج" اللي بيطلع يهزر ويضحك وهو بيعمل سمك كل ده ورا شخص واحد بس اسمه مؤمن عادل
مؤمن مش شيف ولا حتى اشتغل في مطاعم قبل كده، ده خريج كلية الطب البيطري يعني دكتور بس هو ملاقش شغفه في المجال ده، و كان حاسس إن مستقبله في حتة تانية، فقرر ياخد خطوة جريئة ويسيب مجاله، ويدخل في حاجة بيحبها وهو الأكل
مؤمن بدأ بمحل صغير للحلويات، سماه "بـلبن"، بيبع فيه رز بلبن، كنافة، حاجات بسيطة، لكن معمولين بطريقة مختلفة تمام ومع الوقت الناس بدأت تتكلم على المحل ده والزباين كتروا، وسمعة المحل بقت قوية، وفجاءة المحل الصغير اتحول لسلسلة فروع في كل حتة
بعد النجاح ده، مؤمن قرر يعمل براند تاني ويدخل عالم الشاورما، وفتح أول فرع من "كرم الشام"، وعلى طول.الناس وقعت في حب الأكل هناك ، والاسم بقى ترند على السوشيال ميديا، وخلاص بقى أي فرع جديد يفتحر يتحول لزحمة لحد ما خلاص ده بقى العادي لمحلات مؤمن عادل
لكن مؤمن ما وقفش هنا وفي مرة شاف راجل بسيط اسمه "عم بهيج"، كان فاتح محل سمك صغير في امبابه فقرر يساعده، ويديله فرصة، دخل معاه شراكة، وفتحوا سلسلة مطاعم "بهيج"
ميزة المطعم ده أن أسعاره.كانت مناسبة، والأكل نظيف وفكرة الدعايا بخفة دم عن بهيج خلت الناس تحب الفكرة اكتر وطبعا نجاح بهيج مقلش عن بلبن وكرم الشام
ودلوقتي مؤمن بقى عنده 6 براندات كنافة زبسبوسة ووهمي و وعم شلتت وبلبن وكرم الشام وبهيج، واكتر من 115 فرع في مصر والوطن العربي كمان
بس طبعا كل ده مكنش بالساهله قابلته صعوبات كتير آخرهم لما محلاتهم في مصر والسعودية قفلوا لكن بعد أيام رجع تاني وقف على رجليه وكل فروع فتحت بنجاح ميقلش عن نجاح بداياته
وفي مرة عمرو اديب سال مؤمن ياترى جبت فلوس كل الفروع دي منين ولا ده تمويل خارجي، هنا مؤمن قال إن فلوس كل الفروع دي جت من تعبه ومن نجاح شغله
وقال إن مش بيقبل اي تمويل فلوس كل فروعه والبرندات بتاعته مصرية 100%، ومش ناوي لا يشارك حد ولا ياخد اي تمويلات خارجية
مؤمن مثال الشاب المكافح اللي بدأ من صفر، لا كان معاه رأس مال كبير، ولا ورث، بس كان معاه حلم وشغل على نظيف، عشان كده قدر أنه يبقى اصغر وأشهر رجل اعمال في مصر
ودلوقتي قولنا جربت تاكل من محلات مؤمن عادل قبل كده شاركنا بتعليقك...