لو معاشك مش بيكفيك.. ازاي تقدم على معاش استثنائي من الحكومة؟
ناس كتير اليومين دول بتسأل عن المعاش الاستثنائي، وبيكتبوا عنه كتير على السوشيال ميديا وعلشان كده جمعنالك كل اللي محتاج تعرفه عنه
مبدئيا كده المعاش الاستثنائي ده نوع خاص من المعاشات بتصرفه الهيئة القومية للتأمين الاجتماعي لفئات معينة
بس يعني إيه معاش استثنائي؟
اقولك، ده دعم مادي بيتصرف لناس خدمت في الحكومة أو القطاع العام وماكنوش بيقبضوا معاش، أو ممكن يتصرف لتحسين المعاش بتاع ناس تانية ظروفهم الصحية أو الاجتماعية صعبة.
الوزارة قالت إن اللي ليهم حق يقدموا على المعاش ده هما اللي كانوا شغالين في الجهاز الإداري للدولة أو القطاع العام أو شركات قطاع الأعمال، ومبياخدوش معاش حاليًا
أو أسر الناس اللي توفوا وكانوا موظفين مدنيين في الدولة، والناس اللي عملوا خدمات كبيرة للبلد، أو أسرهم بعد وفاتهم.
أو ضحايا الكوارث العامة لتحسين معاشهم علشان يقدروا يتجاوزوا الظروف اللي مروا بيها.
وعلشان تقدم عليه لازم تروح تاخد نموذج طلب المعاش الاستثنائي من جهة شغلك القديمة أو مكتب التأمينات، وتملاه وتختمه رسمي
بس لو بتطلب تحسين المعاش بسبب مشاكل صحية، بيتم تحويلك لهيئة التأمين الصحي، وبتعرض حالتك على لجنة طبية تحدد مدى احتياجك لعلاج طويل
ولو السبب ظروف اجتماعية، بيتعملك بحث اجتماعي يشوف دخلك ووضعك وهل تستحق المعاش ولا لأ، بعد كده الطلب بيتعرض على لجنة أولية تراجع الحالة، وبعدها بيروح للجنة عليا بتاخد القرار النهائي يا إما توافق على صرف المعاش، يا إما تحسين المعاش الحالي
لو تعرف حد من قرايبك ممكن يكون ليه حق، متتأخرش وابدأ بالإجراءات معاه