لغز أحمد حجازي.. بيكلم نفسه.. وبيقدّم عروض شغل للفنانات!
فجأة كده صحينا لقينا على دماغنا واحد اسمه أحمد حجازي.. بيقول على نفسه "ملك الأناقة"، وملياردير، ومهندس، ومؤثر، وممكن يبقى منقذ البشرية كمان!
بس الغريبة إن مافيش حد عارف هو مين أصلًا، ولا اشتغل إيه، ولا بدأ منين، ولا حتى معاه شهادة توضح نوع الهندسة اللي واخدها.
هو إحنا إمتى بقينا نحتفل بالفاضي؟ .. يعني أي حد يلبس بدلة بتلمع، ويقف جنب عربية غالية، ويقرا آية قرآنية كده على صورة فيها كوباية لاتيه، يبقى نجم ومؤثر؟
أحمد حجازي.. أو زي ما هو حب يسمي نفسه "ملك الأناقة"، بيقول إنه عنده ٣٣ سنة، وثروته ٢٧ مليون دولار…
طب شكرًا على المعلومة، بس يا ريت تقولنا منين؟ يعني اشتغلت إيه؟ فتحت مشروع؟ عندك مصنع؟ ولا شغال في شركة وهمية بره الكوكب؟
الموضوع كله صور من مطار، عربية قدام فندق، ولبس ماركات، وتيشيرت شفاف كأنك طالع من كتالوج أو سهرة من إياهم..
بيعمل فيديوهات بيتكلم فيها مع المراية، ويقول كلام شبه التنمية البشرية، بس نسخة تايواني.. لا فكرة مفيدة، ولا موضوع له معنى، بس المهم يبين إنه "بيفكر"، وهو زيرو عقل أصلا .. ربنا يعافينا.
لكن كله كوم ولما طلع قدم عرض عمل للفنانة مها أحمد كوم تاني!
قالك: "أنا المهندس أحمد حجازي، بتقدم بعرض عمل لمها أحمد، مقابل انها تعتزل التيك توك وهتاخد ضعف اللي بتاخده شهرياً".
يعني إيه؟ .. بجد؟ .. ده إنت داخل بفلوسك في منطقة حساسة أوي!
يعني هي الفلوس بقت وسيلة تشتري بيها قرار الناس؟ ولا دي محاولة منك تتشهر على قفا حد؟ .. ولا أصلًا إنت فاكر السوشيال ميديا مسابقة "مين يحرج نفسه أكتر ويكسب تريند"؟
والمصيبة الأكبر… إنك لما تفتش ورا أحمد حجازي، مش هتلاقي غير صور ... لا فيه مشروع، ولا فيه سيرة ذاتية، ولا حتى أي مصدر موثوق قال إنه اشتغل في حاجة حقيقية!
إنت فاكر نفسك مؤثر؟ ... إنت مؤثر على أعصابنا يا نجم ...
أحمد حجازي مش ملك الأناقة .. هو ملك "أنا صورت نفسي وأنا لابس أبيض في أبيض" .. ملك الـ "شو من غير مضمون"،
أو ممكن نقول عليه بكل أريحية: "فقاعة بتتنفخ بالموبايل والانستجرام والصور.. وتفرقع لما حد يسأل: حضرتك بتشتغل إيه؟"