أبوه اتمسك بيه لآخر لحظة.. الأمير النائم حكاية استمرت 20 سنة!
قصة بدأت بحلم وانتهت بصبر مالوش حدود شاب نام من عشرين سنة والدنيا كلها كانت مستنياه يصحى بس للاسف صدم الكل بنهايته
الأمير النائم اللي قلبه بيدق بس عينه ما بتفتحش ايه حكايته وايه سبب اللي حصله .. تقريبا مفيش حد في الوطن العربي ما سمعش عن "الأمير النائم" شاب سعودي اسمه الوليد بن خالد بن طلال لسه في عز شبابه وطالب في الكلية العسكرية.لكن حصلت له لحظة غيرت حياته للأبد
الامير اتعرض لحادث سير في سنة 2005 ومن ساعتها، وهو عايش في غيبوبة لمدة 20 سنة كاملة
تخيل 20 سنة نايم.لا بيتكلم، لا بيشوف، لا بيحس بالناس
بس قلبه شغال ونفسه شغال وعيلته فضلت جنبه، ما سابتوش لحظة
أبوه الأمير خالد بن طلال، كان دايمًا بيقول "الله هو اللي يحيي ويميت.. مش الأجهزة اللي تفصلها وخلاص" ورفض لسنين طويلة يشيل الأجهزة عنه، رغم إن كل الأطباء قالوله "حالته ميؤوس منها"
بس الوليد ما بقاش مجرد مريض بقى رمز للناس اللي ما بتستسلمش بقى "الأمير النائم" اللي كل صورة جديدة ليه كانت بتلف السوشيال ميديا، وكل دعوة كانت بتوصل لقلوب ملايين
وفي مرة انتشر فيديو ليه وهو بيحرك راسه يمين وشمال،
وقتها الدنيا كلها اتقلبت، الناس فرحت وقالوا "دي بداية أمل"، بس للأسف الحالة ما اتطورتش بعد كده.
لان حالة زي دي الطب بيقول إنها ما بترجعش
بس أبو الوليد قرر يعيش بالإيمان، مش بالتقارير الطبية
وجاب له فريق طبي من أمريكا وإسبانيا، حاولوا يعالجوه لكن ما كانش فيه استجابة.
وعدى سنة واتنين وعشرة.ولحد ما دخلنا في السنة العشرين
ورغم.مظع الناس ما نسيتوش، كل فترة كانت تظهر صور ليه في العناية، وكل صورة كانت بتقول لسه فيه أمل
لكن يوم السبت اللي فات، الديوان الملكي السعودي أعلن
"وفاة الأمير الوليد بن خالد بن طلال بن عبدالعزيز آل سعود"
وفاته كانت هادية بعد صراع طويل وصامت
والصلاة عليه تمت في جامع الإمام تركي بن عبدالله بالرياض، وسط حزن كبير من اللي عرفوه ومن اللي بس سمعوا عنه ودعوله من قلوبهم
ربنا يرحم الأمير الوليد ويجعل صبره ووجعه في ميزان حسناته، ويجزي أهله خير على تعبهم وتمسّكهم بيه لحد آخر لحظة