أغنى موظف في السعودية.. مين المصري محمد جلال صاحب أعلى راتب؟!

تخيل كده إن في مدير تنفيذي في السعودية بياخد أكتر من 73 مليون ريال في السنة.يعني بالمصري كده حوالي 600 مليون جنيه

والأغرب إن المدير ده مصري اسمه محمد جلال الراجل ده  قلب موازين السوق، وغير  شكل تجارة الإلكترونيات في الخليج

بس  إزاي وصل للرقم ده؟ وليه كل الناس بتقول إنه أغلى مدير تنفيذي؟

انت عارف إن في مدير تنفيذي في السعودية الناس كلها اتكلمت عنه لأنه اتقال إنه الأعلى أجرًا في البلد والغريب أن الراجل ده مصري و اسمه محمد جلال الرئيس التنفيذي لشركة اسمها "إكسترا" ودي شركة متخصصة في بيع  الإلكترونيات والأجهزة والموبايلات

بس القصة مش في الشركة القصة في الشخص نفسه الراجل ده كان شغال في شركة عالمية اسمها "P&G"من الشركات اللي المرتبات فيها بالدولار والمستقبل فيها مضمون بس قرر فجأة يسيب كل ده وقال أنا مش عايز أفضل موظف ناجح

أنا عايز أبني حاجة من الصفر وأسيب بصمة وأبني شركة  تنافس على مستوى العالم

وفعلاً ساب المنصب الكبير والمكافآت ودخل في مغامرة وبدأ يبني "إكسترا" من سنة 2003 وقعد سنتين بس يشكل فريق جاب ناس عندهم خبرات مختلفة وعملوا مع بعض حاجة جديدة على السوق

بس لما بدأ الشغل الحقيقي اكتشف إنه مش فاهم السوق ولا طريقة البيع قالك ساعتها الجهل بيكون نعمة لأنه خلاني أسمع وأتعلم وأجيب ناس أذكى مني لحد بقينا نشتغل كفريق واحد وده كان السر

الشركة كبرت سنة ورا التانية وبقت عندهم فروع في السعودية والبحرين وعمان والمبيعات وصلت لـ7 مليار ريال في السنة وبقت واحدة من أكبر الشركات في قطاعها

بس في سنة 2022 الشركة كانت محققة إنجاز كبير جدًا

وقرروا يكافئوا 5 من المدراء التنفيذيين بمنحة أسهم أدوهم السهم بـ47 ريال وبعدها السهم وصل لـ145 ريال

فالناس كلها قالت هو ده أعلى مدير تنفيذي أجرًا في السعودية بس محمد جلال رد وقال أنا لا الأعلى أجرًا ولا الأقل والمنحة دي لمرة واحدة بس مش مرتب سنوي ولا حاجة ثابتة دي كانت مكافأة على إنجاز كبير اتحقق

وفي نفس السنة تم تصنيف محمد جلال فهمي كأعلى راتب ومكافآت وبدلات في السعودية مع ٤ أشخاص تاني 

لكن في 2023 اتراجع ترتيبه للمرتبة الثالثة ضمن أعلى الرؤساء التنفيذيين في المملكة، براتب إجمالي  73.8 مليون ريال، لكن رغم التراجع في الترتيب، محمد لسه من أبرز القيادات الاقتصادية في السعودية، وشركات كتير حلمها أنه يشتغلوا معاه ويستفادوا من خبرته

محمد كمان واحد من أكتر الناس اللي اشتغلت وتعبت علشان توصل لأنه في 2013 ساب منصب الرئيس التنفيذي ولما حصلت أزمة في 2016 ورجعت الشركة تخسر

رجع بنفسه يقودها تاني والخسارة اللي كانت 45 مليون ريال

اتحولت بعد كده لأرباح 500 مليون

يعني مش بس راجل عنده مرتب كبير ده راجل عارف هو بيعمل إيه وقادر يرجع الشركة من فوق الحافة وده اللي يخلي أي مكافأة ياخدها تبقى مستحقة

 اللي بيميز محمد عن غيره هو أن دايما لازم يضيف اي شئ مختلف في المكان اللي بيشتغل فيه وده قال بنفسه في برنامج التمانية، أن  اكيد فيه كتير شركات بتقدم نفسه منتجه بس هو دائما بيفكر ازاي يميز نفسه ويقدم كل ما هو جديد

ودلوقتي قولنا اغلى مرتب اخدته في حياتك كان كام؟