التجار بيبعوا بأقل من السعر الرسمي.. انخفاضات كبيرة في سوق العربيات

اللي كان بيتدفع فيه مليون ونص دلوقتي بيتعرض بأقل من كده بكتير، خلاص السوق اتقلب واللي ماكانش في الحسبان بدأ يحصل

ايه اللي بيحصل في سوق العربيات والانخفاضات دي هتستمر كتير ولا لا.

واضح إن سوق العربيات في مصر دخل مرحلة جديدة خالص اللي كان بيشتري عربيته بأوفر برايس من شهور، ممكن يلاقي النهاردة نفس العربية بتتباع باقل من السعر الرسمي 

 السوق اتقلب، والأسعار بقت في النازل ،بس السؤال إيه اللي حصل؟ وليه التغيير ده جه فجأة؟

أسامة أبو المجد، رئيس رابطة تجار العربيات في مصر، طلع وقال أن فيه تجار بقوا يبيعوا أرخص من السعر اللي الوكيل نفسه محدده، وده سببه إن مفيش أوفر برايس زي زمان، لأن ببساطة العرض بقى متوازن مع الطلب.

يعني العربيات بقت موجودة، والمخازن فيها ستوك، والناس بقت بتفكر وتختار مش أول عربية تلاقيها تشتريها وخلاص.

ومن الحاجات اللي ساعدت على كده بشكل كبير، هو إن مصر بدأت تشتغل على التصنيع المحلي، ومصانع جديدة لتجميع العربيات اتفتحت، وفيه مصانع تانية جاية في الطريق، وده عمل فرق كبير في الأسعار، خاصة في الفئة الاقتصادية.

يعني العربيات اللي كان فيها تنافس عالي، زي اللي في حدود 400 لـ700 ألف جنيه، الأسعار فيها نزلت جامد في آخر شهرين.

وطبعا دخول موديلات جديدة لأول مرة في السوق المصري، زود المنافسة أكتر العميل بقى قدامه اختيارات كتير، وكله بيحاول يكسبه بالسعر والمواصفات.

ده غير استقرار سعر الدولار مقابل الجنيه الفترة دي، كان ليه دور كبير في اللي بيحصل، لأن كلنا عارفين إن أي حركة في الدولار، بتقلب السوق فوق تحت.

طبعا ده خلى أسعار العربيات اللي في الفئة الاقتصادية غالبًا هتثبت على اللي هي عليه، وده بعد موجة التخفيضات اللي حصلت مؤخرًا.

لكن الغريب إن فيه توقعات بانخفاضات كمان بس المرة دي في الفئة الغالية عشان  العربيات اللي بتتراوح أسعارها من 2 لـ3 مليون جنيه، ممكن تنزل أكتر في الأسابيع الجاية

والملفت في كل ده إن السوق مش بس بيهدي ده كمان بيحقق أرقام وخلال أول خمس شهور من سنة 2025، اتباعت حوالي 58 ألف عربية، وده بزيادة تقريبًا 95٪ عن نفس الفترة السنة اللي فاتت.

لكن كمان الشاحنات التجارية حققت أعلى نسبة نمو، بأكتر من 103٪ والأوتوبيسات. زادت بنسبة حوالي 47٪.

يعني من الآخر السوق بيتنفس من جديد ووكالات عالمية زي "فوكاس تو موف" بتقول إن مصر ماشية على طريق التعافي الحقيقي، وإن اللي حصل في 2024 من نمو بنسبة 11٪، هيكمل في 2025.

والحكومة كمان شغالة على دعم الصناعة المحلية، وبتقدم حوافز ضريبية علشان تصدّر وتخلي مصر مركز إقليمي لصناعة العربيات.

يعني لو ناوي تشتري عربية ده انسب وقت ليك