حسن عبدالله.. صانع القرارات الجريئة
في عز ما البلد كانت بتغلي والدولار بيطير والسوق السودا مولعة، دخل علينا شخص بدأ يقلب التربيزة على الكل الدولار نزل، السوق السودا اختفت، والاقتصاد بدأ يتنفس من جديد
اللي عمل كل ده مش ساحر ده حسن عبد الله، محافظ البنك المركزي، اللي أثبت إن الشطارة مش في الكلام الشطارة في النتايج.
تخيل كده تبقى بلد كاملة بتغرق في أزمة دولار، السوق السودا شغالة نار، والأسعار بتولع كل يوم وفجأة، ييجي راجل مش بيحب الكلام الكتير ولا بيحب الكاميرات، ولا التصريحات وبهداوة كده، يقلب الموازين
حسن عبد الله، محافظ البنك المركزي الراجل اللي استلم الراية أول ما طارق عامر استقال في أغسطس 2022، لما كانت مصر وسط أزمات كتير أهمهم أزمة روسيا وأوكرانيا اللي كانت مأثرة على كل حاجة خصوصا في الأسعار ده غير أزمة نقص العملة و السوق السودا والمستثمرين الأجانب اللي خافوا وبعدوا
عشان يدخل علينا حسن عبد الله من غير فرقعة إعلامية، ولا وعود وردية ويجي بخطة مبنية على حاجة واحدة: "توحيد سعر الصرف والقضاء
على السوق السودا".
وفعلًا، في مارس 2024، البنك المركزي أعلن تحرير كامل لسعر الصرف يعني الدولار بقى بسعره الحقيقي، سواء في البنك أو بره والنتيجة انالسوق السودا اختفت، والفجوة بين السعرين اتقفلت والناس بدأت تتعامل تاني بالجنيه
مش بس كده ده الاحتياطي النقدي ارتفع لـ 46.1 مليار دولار.يعني رجعنا نقدر ندفع التزاماتنا ونستورد براحتنا
والبنوك اللي كانت خسرانة بسبب أزمة الدولار رجعت تحقق أرباح تاني
والصافي بتاع الأصول الأجنبية اتحول من عجز 29 مليار لفائض 14 مليار دولار وده في 3 شهور بس
ده غير إن التضخم اللي كان وصل 38% نزل لأول مرة لـ28% وده معناه إن الأسعار بدأت تستقر خصوصًا بعد ما البنك المركزي رفع الفايدة 8% عشان يتحكم في التضخم ويحافظ على قيمة الجنيه
عشان كده المستثمرين الأجانب رجعوا يشتروا أذون خزانة بالجنيه بعد ما كانوا قافلين الباب خالص ودخلوا حوالي 19 مليار دولار في شهر واحد! والرصيد وصل 33.6 مليار دولار
وطبعًا مش لازم ننسى إن البنك المركزي وقف الخساير
وبدأ يحقق ربح لأول مرة من سنين وكمان الدين الخارجي نزل لـ 160 مليار بعد ما كان قرب 168 ومع الوقت بدأنا نقلل الضغوط اللي علينا شوية شوية
والأهم من ده كله مفيش قسط اتأخر مصر سددت كل المستحقات الدولية في مواعيدها وده خلى التصنيف الائتماني بتاعنا يثبت.وساعد على تحسين سمعة الاقتصاد برا
كل ده حصل من غير دوشة، ولا شو إعلامي بس برؤية واضحة، وتنفيذ صارم
كل ده يخلينا نقول إن حسن عبدالله هو رجل المستحيل اللي حقق كل ده بادارته وشطارته من غير ما يكلم كتير لانه مش محتاج يتكلم شغله هو اللي قال كل حاجة