أرخص عربية كهرباء في مصر.. تبدأ من 770 ألف جنيه.. اعرف المواصفات

انت عارف انك تقدر دلوقتي تركب عربية كهربا زيرو وفيها كل الإمكانيات الي تتخيلها من غير ما تدفع رقم خرافي، أيوه والله، الكلام ده بقى حقيقي بعد ما نزلت دونج فينج بوكس Box

واللي تعتبر أرخص عربية كهربا جديدة في السوق المصري حاليًا، العربية دي مش بس رخيصة، دي معمولة مخصوص علشان الناس اللي نفسها تبدأ تستخدم عربيات كهربا، بس كانوا شايفين إن الأسعار مبالغ فيها ومش في المتناول

وعلشان كده تحالف "الصافي و النصر " قرر ينزل العربية دي بسعر يناسب فئات كتير، ومن غير ما يضحوا بجودة التصنيع ولا التكنولوجيا الحديثة، علشان كده "بوكس" بقت مرشحة إنها تكون من أكتر العربيات اللي هتنتشر وسط الفئة الاقتصادية في مصر، لأنها بتقدملك حل عملي ونضيف وموفر، من غير ما تتنازل عن الراحة ولا الأمان

العربية تصميمها عصري وشكلها ملفت، وفيها كل اللي تحتاجه علشان تنقل مشاويرك اليومية بسهولة، كمان بتتوفر بفئتين من التجهيزات، يعني تقدر تختار اللي يناسبك

 العربية جاية ببطارية ليثيوم فوسفات سعتها 42.3 كيلو وات في الساعة، بتديك مدى قيادة يوصل لـ 430 كيلو في الفئة الأعلى، و330 كيلو في الفئة الأولى، وده مدى ممتاز سواء لمشاويرك جوا المدينة أو حتى السفر لمسافات متوسطة

العربية كمان قوتها 95 حصان، وعزمها 160 نيوتن.متر، وبتشتغل بنظام جر أمامي بيخلي السواقة نعمة وسلسة في كل الظروف، ومن صفر لمية بتوصل في حوالي 12.5 ثانية، وسرعتها القصوى 140 كم في الساعة، يعني أداء محترم جدًا بالنسبة لسعرها، وكمان هي أول موديل بيتعمل على منصة اسمها Quantum Architecture S3، وده بيديها ثبات وجودة أعلى

وبالنسبة للتجهيزات فيها كل اللي ممكن تتوقعه من عربية حديثة، وسائد هوائية، نظام ثبات إلكتروني، مثبت سرعة، جنوط 17 بوصة، شاشة 10.25 بوصة، فتحة سقف، كاميرا 360 درجة، شاحن موبايل لاسلكي، ومسند يد أمامي، يعني فعلاً مش هتحس إنك بتضحي بحاجة

وبتنزل بفئتين، الأولى بـ 770 ألف جنيه، والتانية الأعلى تجهيزًا بـ 870 ألف، وده بيخليها واحدة من أرخص وأكتر العربيات الكهربائية إقناعًا في السوق دلوقتي

يعني لو بتدور على عربية كهربا محترمة، شكل حلو، أداء ثابت، تجهيزات محترمة، وسعر معقول"دونج فينج بوكس" تستاهل إنك تشتريها بجد.