مش هتدفع مليم واحد.. تفاصيل بكالوريوس العلوم المصرفية بعد إطلاقه في مصر!

برنامج جديد في مصر هيغير شكل دراستك ومستقبلك المهني تمامًا .. بكالوريوس العلوم المصرفية هيفتح لك الطريق تشتغل في أكبر البنوك والمؤسسات المالية داخل مصر وبرا كمان

ايه حكاية بكالوريوس العلوم المصرفية وايه مميزاته كل دي تفاصيل هتعرفها معانا في الفيديو ده..

بكالوريوس العلوم المصرفية 

تخيل إنك تدخل جامعة وتدرس  فيها حاجة مكنتش  موجودة قبل كده في مصر، الهدف منها انك تكون واحد من الكوادر المصرفية اللي تقدر تشتغل في أي بنك أو مؤسسة مالية في العالم مش بس في مصر

بس من غير ما تتخيل الحاجة دي بقت موجودة في مصر وحسن عبد الله، محافظ البنك المركزي المصري، أعلن عن إطلاق برنامج بكالوريوس العلوم المصرفية بالتعاون مع وزارة التعليم العالي والمجلس الأعلى للجامعات والمعهد المصرفي المصري.

البرنامج ده هينطلق بداية من سبتمبر الجاي في خمس جامعات حكومية كبداية، ومع الوقت هيتوسع لجامعات تانية في كل المحافظات.

ميزة البرنامج ده انك  مش بس تاخد شهادة محلية، لكن كمان في السنة الأخيرة هتكون قدامك الفرصة تاخد شهادة دولية، البنوك هتمول لك 50% من تكلفتها، والنص التاني هيكون قرض، ولو نجحت في الامتحان مش هتدفع ولا مليم منه.وده بيخلي البرنامج مختلف تمامًا عن أي دراسة تقليدية.

الدراسة هنا مدتها أربع سنين، لكنها مش مجرد محاضرات في قاعة، لأن البرنامج بيربط بين التعليم الأكاديمي العملي والبنك المركزي نفسه، وكمان التكنولوجيا المالية اللي هي مستقبل البنوك في العالم.

كمان هتلاقي جزء تدريبي إجباري بيتم بالتنسيق بين المعهد المصرفي المصري والبنوك، والتدريب ده مش هيكون مجرد صيفي روتيني، لكن تدريب احترافي بأسلوب جديد، والمادة العلمية هيقدمها ناس شغالة فعلًا في البنوك ومعاها خبرة حقيقية من السوق.

ولو متعرفش حاجة عن التخصص ده فتخصص العلوم المصرفية بيجمع ما بين إدارة الأعمال والمحاسبة والتمويل، وهيخليك تفهم أسواق المال، شركات الاستثمار، البنوك التجارية والمركزية، البنوك الإسلامية، وحتى شركات التأمين. وكمان هتتعلم كل تفاصيل التداول والاستثمار والتعامل مع الأوراق المالية، بحيث لما تتخرج تكون عارف الجانب النظري والعملي معًا.

المميز في التخصص ده إن مجالات العمل فيه واسعة جدًا، يعني ممكن تشتغل في البنوك المحلية أو الدولية، في قطاع التأمين، وفي شركات الوساطة وبنوك الاستثمار، أو حتى في المؤسسات المالية الحكومية والشركات التجارية الكبيرة. يعني ببساطة، الأربع سنين دراسة هتكون بمثابة جواز سفر وظيفي يخليك تبدأ مشوارك المهني بخطوة ثابتة، وفي أي بلد تختارها.

في النهاية، البرنامج مش بس بيمنحك شهادة، لكنه بيصنع منك شخص قادر ينافس في أكبر أسواق المال في العالم، وعنده المهارات والتدريب اللي يخليه مطلوب من أول يوم عمل

ودي خطوة حقيقية لربط التعليم بسوق العمل وبناء جيل جديد من الخبراء المصرفيين.

ودلوقتي قولنا ممكن تدرس مجال العلوم المصرفية وايه رايك في المجال ده.. شاركنا بتعليقك