مش هتعرف تشحنها تاني.. بروتوكول جديد يمنع العربيات الصيني من شحنها في مصر
تخيل تدفع الوفات في عربية كهربا، وتفكر إنك بتواكب المستقبل وبتوفر فلوس البنزين وبعدين تكتشف إنك مش عارف تشحنها ولا في محطة ولا على الطريق.ولا حتى في مشوار سفر بسيط .. وكل ده علشان بروتوكول أيوة كلمة صغيرة، بس ممكن توقفلك حياتك كلها.
مطلوب شاحن
تخيل تكون شارى عربية كهربا، ومبسوط إنك بتوفر بنزين وفجأة تتكتشف إن عربيتك متقدرش تشحن في أي محطة سريعة علشان نوع الشحن اللي فيها مش موجود أيوه.هي دي المشكلة اللي بتحصل دلوقتي في مصر، وانا هقولك المشكلة دي ببساكة
فيه نوعين مشهورين من بروتوكولات شحن العربيات الكهربا .. واحد اسمه GB/T، وده اللي بتستخدمه أغلب العربيات الصينية .. والتاني اسمه CCS2، وده البروتوكول الأوروبي، اللي الحكومة المصرية ناوية تعتمده كمعيار رسمي وموحد في كل محطات الشحن.
يعني ببساطة، لو الحكومة خدت القرار ده، أي عربية كهربا جاية من الصين وشغالة بـ GB/T، مش هتقدر تشحن في المحطات العامة والسريعة وهتضطر تشحنها في البيت بس أو تدور على حل بديل.
القرار ده لسه تحت الدراسة، لكن البداية حصلت فعلاً .. في شهر 4 اللي فات، لما حهاز تنظيم الكهرباء قال إن مفيش دعم هيكون لبروتوكول GB/T في المحطات السريعة، والقرار ده دخل حيز التنفيذ، يعني خلاص مبقاش ينفع تشحن بالعربية الصينية في الطريق.
طيب الحكومة بتعمل كده ليه؟
الفكرة إنهم عايزين يوحدوا نظام الشحن، علشان كل المحطات تكون شغالة ببروتوكول واحد، وده طبعًا هيبقى أسهل وأأمن لأي حد يركب عربية كهربا.
بس فيه مشكلة أن أكتر من نص العربيات الكهربا اللي موجودة دلوقتي في مصر جاية من الصين، وكلها شغالة بـ GB/T،يعني القرار ده ممكن يبوظ على ناس كتير حياتهم اليومية،خصوصًا إن كتير من الناس اشترت العربيات دي من غير ما تفهم الفرق في البروتوكول.
علاء السبع خبير السيارات قال إن لسه مفيش قرار نهائي، وإن في نقاش كبير في الحكومة بين مؤيدين ومعارضين،
علشان لازم يتعمل حساب للناس اللي اشترت فعلاً، وكمان للمنافسة العادلة في السوق.
وقال إن فيه عربيات بتدخل عن طريق وكلاء رسميين، ودي ساعات بيتم تعديلها علشان تشتغل بـ CCS2، لكن فيه عربيات بتيجي بشكل شخصي من الصين ودي بتيجي زي ما هي، ومينفعش تشحن في المحطات العامة دلوقتي.
علشان كده في ناس بتطالب إننا نسيب البروتوكولين شغالين مع بعض شوية، ونعمل فترة انتقالية، علشان الناس تلحق تظبط نفسها، بدل ما نصحى نلاقي نفسنا مش عارفين نمشي بالعربية.
واللي بيأكد أهمية ده إن سوق العربيات الكهربا في مصر بيكبر، وصلنا لـ حوالي 15 ألف عربية كهربا في 2025، بعد ما كانوا 11 ألف بس في آخر 2024، وده معناه إن فيه ناس كتير داخلة في المجال، ولازم يكون فيه تخطيط مناسب.
بس فيه مشكلة تانية أن محطات الشحن قليلة جدًا، والناس مضطرة تشحن في البيت بالليل، وده ميخليش العربية تنفع لسفر أو شغل كتير بره.