عملها من الخردة وبـ5000 جنيه.. مخترع الصعيد اللي قلب الدنيا بالفيراري بتاعته!

ولد عنده 17 سنة قدر أنه يعمل عربية كاملة بإيده من الخردة تكلفتها كلها ما زادتش عن 5 آلاف جنيه، انت متخيل 

لا وايه دي عربية  بتمشي ببنزين 80 وتوصل سرعتها لـ 80 كيلو في الساعة. 

بس ايه الحكاية ومين الولد اللي اخترع العربية دي وليه بيقولوا عليها فيراري الصعيد، ده اللي تعرفه معانا بس تابعنا..

مخترع الصعيد 

من مدينة الوقف في قنا، ظهر ولد عنده شغف مختلف من صغره وهو دماغه شغالة في الاختراعات، بيحب يفك ويركب أي حاجة قدامه عشان يتعلم منها.

اسمه إسماعيل أحمد إسماعيل أول اختراعاته كانت بسيطة جدًا ونش صغير وغسالة عملهم بإمكانيات محدودة جدًا بس الحلم عند إسماعيل عمره ما وقف عند الحاجات الصغيرة.

من أول ما كان في الإعدادية، بدأ يرسم ويحط خطط لاختراع أكبر عربية كاملة من الصفر سماها "فيراري الصعيد" الفكرة بدأت بخشب، وبعدها طورها لحديد جمعه بنفسه من خردة متاحة حواليه.

 كل يوم اسماعيل كان يضيف عليها حاجة جديدة، يغير، يطور، لحد ما بقت عربية تمشي بسرعة 80 كيلو في الساعة، وتشتغل ببنزين 80 زي أي عربية حقيقية.

الناس في الأول سخروا منه، قالوله "إيه الهزار ده؟"، بس السخرية كانت بالنسبة له وقود كل كلمة ضحك كانت بتخليه يركز أكتر ويشتغل بإصرار. لحد ما بقت "فيراري الصعيد" مش مجرد فكرة، لكن عربية كاملة بتتحرك بيها في البلد، يروح بيها المدرسة أو أي مشوار.

العربية اللي عملها إسماعيل مكونة من موتور موتوسيكل، وبطارية، ومساعدين، ودريكسيون وفرامل يعني إعادة تدوير لقطع غيار من حاجات مختلفو، لكنه قدر في الأخر يركبها بإيده بشكل عبقري يخليها تشتغل كويس. والمفاجأة إن كل التكلفة ما زادتش عن 5 آلاف جنيه.

إسماعيل ما اكتفاش بالعربية، ولا بالاختراعات اللي عملها قبل كده زي الغسالة والونش، بالعكس هو بيشوف إن اللي عمله مجرد بداية. بيقول دايمًا: "الإصرار والعزيمة هم السبب في أي نجاح، والمعوقات مش علشان توقفني، بالعكس هي دافع إني أكمل".

طموح اسماعيل دلوقتي أنه  يدخل كلية الهندسة قسم ميكانيكا، يتخرج ويبقى مهندس ميكانيكي كبير، ويكمل مشوار الاختراعات اللي بدأه وهو صغير. 

وبيطلب ان محافظ قنا يشوفه ويكرمه، عشان ده هيديلع دفعة معنوية تكمل معاه المشوار

 "فيراري الصعيد" بقت دلوقتي علامة مميزة في بلده والكل بقى عارف مين هو اسماعيل  اللي بيخترع ويشتغل من غير إمكانيات، و بعد ما كان الكل بيتريق عليه دلوقتي بيضربله تعظيم سلام  

انت بقى قولنا رايك في اختراع اسماعيل؟