استثمارته كلها في العقارات.. وعنده أسطول عربيات ملوش زي.. ثروة مو صلاح!
٩٠ مليون دولار.. قصور في إنجلترا وتركيا ومصر.. أسطول عربيات قيمته ٥٠ مليون جنيه.. عقود إعلانات بملايين مع أكبر شركات في العالم.. استثمارات في العقارات حوالين أوروبا
دي مش ثروة ايلون ماسك ولا سلطان بروناي دي ثروة محمد صلاح، تعالوا بينا نعرف محمد صلاح عمل كام لحد دلوقتي من الكورة ومن استثماراته برا الكورة
محمد صلاح دلوقتي مش بس نجم كورة عادي ده واحد من أغنى وأشهر الرياضيين في العالم ثروته متقدرة بحوالي 90 مليون دولار يعني مليارات بالمصري
بس لو فاكر أن كل المليارات دي جاية من الكورة يبقى متعرفش حاجة.. فلوس صلاح مش جايه من الكورة بس لأ ده شاطر جدًا في استغلال اسمه وشهرته عشان كده عمل مصادر دخل تانية كبيرة، اولهم مرتبه من ليفربول وده جزء مهم من دخله بس هو عرف إزاي يوسع الموضوع وبقى عنده عقود إعلانية ضخمة مع شركات عالمية زي أديداس وبيبسي وفودافون وأودي ودي بتدخل له ملايين كل سنة
كمان فيه تقارير اقتصادية بتقول إنه بيكسب حوالي مليون جنيه إسترليني في الأسبوع من حقوق صورته والأنشطة التجارية المرتبطة بيها، وده لان صلاح مش بس مشهور في أوروبا لأ وجوده قوي جدًا في العالم العربي وأفريقيا وده اللي خلى صورته تبقى كنز لأي شركة عايزة تبيع منتجاتها
أما على مستوى الاستثمارات صلاح موزع فلوسه صح في تركيا في بودروم اشترى فيلا بحوالي 10 مليون دولار والفيلا دي أشبه بمنتجع فيها شاطئ خاص وساونا وحمام تركي وجيم وسينما ومكتبة وفي مانشستر في إنجلترا عنده قصر 3 أدوار فيه اتنين حمام سباحة وملعب جري خارجي وجراج لسياراته الفارهة وجنينة كبيرة بيقضي فيها وقت مع عيلته
وفي مصر عنده فيلا في التجمع الأول بالقاهرة بيروحها كل ما يرجع بلده
نيجي للعربيات هنا بقى صلاح عايش حياة الملوك عنده اسطول عربيات مفيش زيه منهم عربية بنتلي كونتيننتال GT سعرها 160 ألف إسترليني ولامبورجيني أفينتادور 271 ألف إسترليني ومرسيدس AMG GLE Coupe 65 ألف إسترليني ومرسيدس SLS AMG رودستر 176 ألف إسترليني وأودي Q7 54 ألف إسترليني وكمان تويوتا كامري 29 ألف إسترليني ودي من أيام تشيلسي
إجمالي أسطول العربيات بتاعه يوصل لحوالي 755 ألف إسترليني يعني حوالي 50 مليون جنيه مصري
باختصار محمد صلاح قدر يتحول من مجرد لاعب بسيط في قرية صغيرة لواحد من أغنى نجوم الكورة في العالم عارف يحافظ على نفسه وعلى حياته العائلية من غير ما يضيع في دوامة الشهرة